मनोज तांबे, साम प्रतिनिधी

ठाण्यातील तीन हात नाका परिसरात फुट ओव्हर ब्रिजवर लावलेलं होर्डिंग एका दुचाकीस्वाराच्या डोक्यावर कोसळल्याची घटना एक दिवसापूर्वी घडली होती. आता वसईमध्येही अशीच एक घटना घडलीय. येथे एका पायी चालणाऱ्या महिलेवर पत्र्याचं छत कोसळलंय. या दुर्घटनेत महिला गंभीर जखमी झाली आहे.

हाती आलेल्या माहितीनुसार, दीपा अमित दिनोजीया असे या जखमी झालेल्या महिलेचे नाव आहे. दीपा दिनोजीया यांना जवळच्या रुग्णालयात दाखल करण्यात आले आहे. सध्या या महिलेची प्रकृती स्थिरावली असल्याचे सांगितले जात आहे. या घटनेचा व्हिडिओ सोशल मीडियावर व्हायरल झाला आहे. ही घटना 5 जुलै रोजी सायंकाळी सहा वाजता ही घटना घडली होती.

मागील आठवड्यात मुंबईसह उपनगरात पावसाने धुमाकूळ घातला होता. मुसळधार पावसामुळे वसई-विरार जलयम झाला होता. त्याचदरम्यान ही घटना घडल्याचं सांगितलं जात आहे. दरम्यान व्हायरल झालेल्या व्हिडिओमध्ये आपण पाहू शकतो की, एक सदर महिला आणि एक इसम पावसात छत्री घेऊन रस्त्याच्या एका बाजूकडून चालत होते. परिसरात हलक्या स्वरुपाचा पाऊस चालू आहे. त्यामुळे दोघांनी डोक्यावर छत्री घेतलेली दिसत आहे. महिला पुढे चालतेय तर पुरुष तिच्या मागे चालतोय. ते दोघेही एका दुकानासमोर आले असतानाच एका दुकानाचे पत्र्याचे छत्र अचानक कोसळलं. यात महिला गंभीररित्या जखमी झाली.