अंबरनाथ : अंबरनाथ शहरातील नागरी समस्यांबाबत नगरपालिका प्रशासन उदासीन असल्याचा आरोप करत शिवसेनेच्या (ShivSena) महिला आघाडीने अंबरनाथ नगरपालिकेत धडक दिली. यावेळी अंबरनाथ शहरातील नागरी समस्यांचा पाढाच महिला आघाडीने वाचून दाखवला आणि प्रशासनाला अक्षरशः धारेवर धरलं. (Ambarnath Shivsena News)

पावसाळा सुरू होताच अंबरनाथ शहरात अनेक समस्यांनी डोकं वर काढलंय. अंबरनाथ शहरात सध्या अनेक रस्त्यांची खड्ड्यांमुळे चाळण झाली आहे. अनेक ठिकाणी पावसाचं पाणी साचण्याचे प्रकार गेल्या काही दिवसात घडले असून नागरिकांच्या अक्षरशः घरात पावसाचं पाणी जात आहे. तर काही ठिकाणी मोठे नाले तुंबले असून त्याचाही त्रास नागरिकांना सहन करावा लागतो आहे. (Ambarnath Marathi News)

शहराच्या काही भागात गढूळ पाणीपुरवठा होत असून त्यामुळं रोगराई पसरण्याचा धोका निर्माण झाला आहे. या सगळ्याविरोधात शिवसेनेच्या महिला आघाडीच्या शहर संघटक नीता परदेशी यांच्या नेतृत्त्वाखाली महिला आघाडीने अंबरनाथ नगरपालिकेत धडक दिली.

यावेळी मुख्याधिकारी नसल्यानं अतिरिक्त मुख्याधिकारी प्रशांत शेळके यांच्या दालनात जाऊन महिलांनी समस्यांचा पाढाच वाचून दाखवला. या सगळ्यावर पुढील १५ दिवसात सर्व समस्या मार्गी लावण्याचं आश्वासन अतिरिक्त मुख्याधिकारी प्रशांत शेळके यांनी दिलं.

Edited By - Satish Daud