मावळ : मावळातील (maval) पवना धरण (pavana dam) परिसरात धरण बांधत असताना अनेक शेतकऱ्यांच्या (farmers) जमिनी गेल्या आहेत. त्याचा मोबदला अद्यापही शेतकऱ्यांना मिळाला नाही. मात्र आता धरण परिसरात असणाऱ्या जमिनींच्या पांदण रस्त्याचा वाद समोर आला आहे. मुंबईकरांनी धरण परिसरातील अनेक जागा सेकंड होम करिता विकत घेतल्या आहेत. तर पाटबंधारे खात्याने काही जमिनी विकसित करण्याचा दृष्टीने आणि झाडे लावून परिसर नंदनवन करण्यास भाडे तत्त्वावर दिल्या आहेत. परंतु त्याची मुदत संपल्याने भाडेकरू आणि स्थानिक शेतकऱ्यांमध्ये संघर्ष सुरू आहे. आता पवना धरण प्रशासन काय भूमिका घेते याकडे सर्वांचे लक्ष लागून राहिले आहे. (pavana dam latest marathi news)

मावळमधील पवना धरण परिसरात शिंदगाव येथे सर्व्हे नंबर एकवीस ही शासनाच्या मालकीची जागा आहे. त्याला लागूनच सर्व्हे नंबर बावीस मुंबई येथील रहिवासी खोददाद इराणी यांच्या मालकीची आहे. सर्व्हे नंबर २१ हा पाटबंधारे विभागाने इराणी यांना झाडे लावण्यासाठी व त्याची देखभाल करण्यासाठी काही वर्षांसाठी दिला होता.

त्यानंतर आता त्याची मुदत संपल्यावर देखील याठिकाणी शासनाच्या जागेवर इराणी हे मालकी हक्क दाखवत असल्याचा आरोप शिंदगाव ग्रामस्थांनी केला आहे. ही जागा पाटबंधारे खात्याने ताब्यात घेऊन आमच्या गुरांना चारा पाणीसाठी हा पांदण खुला करावा अशी मागणी ग्रामस्थांनी केली आहे.

दरम्यान अनेक वर्षे या सर्व्हे नंबर २१ शिंदगाव येथील जागेचा मुलाप्रमाणे सांभाळ करून हा परिसर स्वच्छ ठेवण्याचा प्रयत्न केला असल्याचा दावा खोदादाद इराणी यांनी केला. दुसरीकडे या जागेची मुदत संपूनही इराणी यांनी या वाटेवर गेट लावून त्याला टाळ ठोकल आहे. त्यामुळे शासनाच्या जागेवर इराणी यांनी ताबा ठोकल्याचा आरोप गावकऱ्यांनी केला आहे. तरी त्यात काही तथ्य नसल्याचा दावा इराणी यांनी केला आहे. शिंदगाव ग्रामस्थ आणि जमीन कसणारे इराणी या दोघांच्या वादावर पाटबंधारे खाते कसा तोडगा काढेल तेच पहावे लागेल. 

शिंदगाव येथील शेतकऱ्यांचे आरोप फेटाळत सर्व्हे नंबर २१ शासनाचा असून ती जागा आता हस्तांतरण करण्यात येणार असल्याचे देखील पाटबंधारे विभागाकडून सांगण्यात येत आहे. तर इराणी यांच्याकडून देखील हे सर्व आरोप फेटाळून लावण्यात आले आहेत. मागील काही वर्षांपासून सर्व्हे नंबर २१ मध्ये झाडे लावून त्यांची निगा राखली आहे. कोणीही येऊन त्याठिकाणी कचरा आणि अस्वच्छता करत असल्याने गेट लावण्यात आले असल्याचे इराणी यांनी स्पष्ट केले.

edited by : siddharth latkar