>> भूषण शिंदे

मुंबई : महाविकास आघाडीच्या डिनर डिप्लोमसीमध्ये संजय राऊतांच्या विधीमंडळाबाबतच्या वक्तव्यावर चर्चा झाल्याची माहिती समोर येत आहे. शरद पवार यांनी देखील संजय राऊत यांच्या वक्तव्यावर काही अंशी नाराजी व्यक्त केल्याची माहिती सूत्रांकडून मिळत आहे.

संजय राऊत यांच्या वक्तव्याशी मी पूर्ण सहमत नाही. पण त्यावर हक्कभंगाची जी समिती नेमली गेली ती न्यायाला धरून नाही. ज्यांनी आरोप केले तेच या समितीत असतील तर न्याय कसा होईल, असं शरद पवारांनी हक्कभंग समितीच्या नेमणुकीबाबत बैठकीत म्हटलं.

एकाधिकारशाही आज लोकांनी नाकारली आहे. विशिष्ट वर्ग आपल्या बाजूने आहे असे समजणाऱ्यांना आज कसबा पोटनिवडणुकीत लोकांनी दाखवून दिले की, आम्हाला गृहीत धरू नये. लोकांचे महविकास आघाडीवर प्रेम आहे, ते आज सिद्ध झाले, असंही शरद पवारांनी म्हटलं आहे.

चिंचवडच्या पराभवावर देखील या बैठकीत चर्चा झाल्याची माहिती आहे. कसबा आणि चिंचवड संदर्भात एकत्र लढल्यावर काय होतं हे आपल्याला दिसलं, बंडखोरी झाली की काय निकाल लागतो ते देखील स्पष्ट झालं. त्यामुळे महाविकास आघाडीमध्ये बंडखोरी होऊ नये यासाठी काळजी घेण्यासंदर्भात देखील आज चर्चा झाल्याची माहिती आहे.