भूषण शिंदे

मुंबई : शिवसेना (Shivsena) नेते आणि खासदार संजय राऊत (Sanjay Raut) यांच्या अडचणींत आणखीन वाढ होण्याची शक्यता आहे. संजय राऊतांशी संबंधित दोन ठिकाणी ईडीची छापेमारी सुरू आहे. तसेच ईडीकडून या प्रकरणाशी संबंधित आणखी काही लोकांना समन्स पाठवण्यात आलं आहे, तर दोन ठिकाणी सर्च ऑपरेशन सुरू आहे. नेमक्या कोणत्या ठिकाणी ही छापेमारी सुरू आहे हे अद्यापही अस्पष्ट आहे. मात्र, ईडीची छापेमारी सुरू असल्याने ईडी कोठडीत असलेल्या संजय राऊतांच्या अडचणींत यामुळे वाढ होण्याची शक्यता आहे. (Sanjay Raut Latest News)

हे देखील पाहा -

शिवसेना (Shivsena) नेते आणि खासदार संजय राऊत (Sanjay Raut) यांना ईडीने अटक केली होती. त्यानंतर त्यांना ४ ऑगस्टपर्यंत ईडी कोठडी देण्यात आली आहे. ईडीने अगोदर ८ दिवसांच्या कोठडीची मागणी केली होती, पण कोर्टाने तीन दिवसांची ईडी कोठडी दिली आहे.

ईडीने राऊतांची सलग ९ तास चौकशी केली होती. या चौकशीनंतर राऊत यांची रात्री १ च्या दरम्यान त्यांना अटक केली. सकाळी मेडिकल तपासणी करुन राऊत यांना कोर्टात आणले गेले होते. संजय राऊत हार्ट पेशंट आहेत ते तपासाला मदत करत आहेत, असा युक्तीवाद राऊत यांच्या वकीलांनी केला. ४ तारखेला पुन्हा संजय राऊत यांना ईडीच्या कोर्टासमोर उभे केले जाणार आहे.

ईडी (ED) कोठडीत राऊत यांना घरचे जेवण देण्याची परवानगी कोर्टाने दिली आहे. संजय राऊत यांना प्रवीण राऊत यांच्याकडून पैसे कसे मिळाले, त्या पैशाचा त्यांनी कसा वापर केला. तसेच प्रविण राऊत यांचा महिन्याचा खर्च, विमानाची तिकिटे संजय राऊत काढून द्यायचे असा आरोप ईडीने केला.

संजय राऊत यांच्या वकिलांनी हे आरोप फेटाळले. राजकारण करुन संजय राऊत यांना अडकवण्याचा प्रयत्न केला जात आहे, असा युक्तीवाद राऊत यांच्या वकीलांनी केला. तसेच यावेळी कोर्टाने यावर ३ दिवसांची कोठडी दिली, या चौकशीसाठी आठ दिवसांची कोठडीची आवश्यकता नाही, असं कोर्टाने म्हटले. (ED Latest News)

Edited By - Akshay Baisane