Chhatrapati Shivaji Maharaj : शिवाजी महाराज हे पक्षा पलीकडचे आहेत. मी जर कुठल्या पक्षात असलो असतो आणि त्या पक्षात जर छत्रपती शिवाजी महाराज यांचा अपमान झाला असता तर मी विरोधी पक्षाच्या स्टेजवर गेलो असतो आणि तिथे सांगितलं असतं की शिवाजी महाराज यांचा अपमान झालाय.......! पक्ष गेला खड्ड्यात. त्या पक्षाची भूमिका देखील मी खड्ड्यात टाकली असती अशी संतप्त प्रतिक्रिया छत्रपती शिवाजी महाराजांचे वंशज तसेच स्वराज्य संघटनेचे अध्यक्ष संभाजीराजे छत्रपती यांनी व्यक्त केली.

संभाजीराजे यांनी व्यक्त केलेली प्रतिक्रिया ही राज्यात सत्तेत असलेलं शिंदे फडणवीस सरकार तसेच छत्रपती शिवाजी महाराजांचे वंशज उदयनराजे भोसले (udayanraje bhosale) यांना चपराक लगावणारी आहे. पिंपरी चिंचवड शहर बंदच्या पार्श्वभूमीवर संभाजीराजेंनी शहरात भेट दिली. त्यावेळी ते माध्यमांशी बाेलत हाेते. (Maharashtra News)

संभाजीराजे छत्रपती म्हणाले आज पिंपरी चिंचवड बंद झाला आहे. उद्या महाराष्ट्र बंद होऊ शकताे. बंद करून लोकांना वेठीस धरण्याची भूमिका माझी नाही. मात्र याचा सत्ताधाऱ्यांनी विचार करायला हवा. राज्यपालांचा प्रश्न अजूनही उपमुख्यमंत्री देवेंद्र फडणवीस यांनी इथेच रखडत का ठेवला आहे ? असा सवाल देखील संभाजीराजेंनी केला आहे.

फडणवीस म्हणतात आम्ही तुमचा निरोप पोहोचवला. पण आमचा निरोप कुठे पोहोचवला आणि त्यानंतर काय कारवाई झाली हे आम्हाला तुम्ही का कळवत नाही ? उपमुख्यमंत्री देवेंद्र फडणवीस यांनी राज्यपालांच्या वादग्रस्त वक्तव्या विषयी आपली भूमिका स्पष्ट करायला हवी असे देखील संभाजीराजेंनी (yuvraj sambhajiraje chhatrapati) नमूद केले.

Edited By : Siddharth Latkar