Mumbai Crime News: मुंबई पोलिसांना पुन्हा एकदा एका अज्ञात इसमाकडून अफवेचा (Rumor) फोन आला आहे. फोनवरील व्यक्तीने हाजीअली येथे १७ अतिरेकी येणार असल्याची माहिती नियंत्रण कक्षाला दिली आहे. ही माहिती मिळताच पोलिसांनी संपूर्ण परिसर पिंजून काढला, मात्र कोणतीही संशयास्पद वस्तू आढळून आलेली नाही. (Mumbai Latest News)

पोलिसांनी (Mumbai Police) त्या नंबरवर पुन्हा फोन केला असता त्याचा फोन बंद येत होता. संबधित फोन हा उल्हासनगरहून आला असल्याचे तपासात समोर आले असून पोलिस फोन करणाऱ्याचा शोध घेत आहेत. सध्या मुंबई पोलिसांना अशा अफवांचे फोन येण्याचा घटनांमध्ये वाढ झाली आहे.

२० ऑगस्ट २०२२ ला देखील मुंबई पोलिसांना धमकीचा मॅसेज आला होता. यात 26/11 सारखा हल्ला करणार असल्याची धमकी अज्ञातांनी दिली होती. त्यावेळीही पोलिसांनी सर्व परिसर पिंजून काढला होता, मात्र हा फोनकॉल देखील खोटा आणि अफवेचा होता.

पोलिसांना अनेकदा असे फोन येत असतात. खबरदारीचा उपाय म्हणून पोलिसांकडून तात्काळ सुरक्षेचा आढावा घेतला जातो, तपासणी केली जाते. मात्र, नंतर अशा बातम्या खोट्या असल्याचं अनेकदा समोर आलं आहे.