अक्षय बडवे, साम टीव्ही पुणे

पुणे लोकसभा मतदारसंघात 'यंदा कांटे की टक्कर' पाहायला मिळाली. महाविकास आघाडीचे उमेदवार रविंद्र धंगेकर विरुद्ध महायुतीचे मुरलीधर मोहोळ यांच्यात तगडी फाईट झाली. दोन्ही उमेदवारांनी एकमेकांविरोधात जोरदार प्रचार केला. आज निवडणुकीचा निकाल (Lok Sabha Election Result) जाहीर होणार असून कुणाचा विजय होणार, याकडे पुणेकरांचं लक्ष लागून आहे.

अशातच आमचे साहेब आज खासदार होणार, असा विश्वास रविंद्र धंगेकर यांच्या पत्नीने व्यक्त केला आहे. पुण्यात मतमोजणीला सुरुवात होण्याआधी प्रतिभा धंगेकर यांनी रविंद्र धंगेकर यांचं औक्षण केलं. त्यानंतर त्यांनी साम टीव्हीसोबत संवाद साधला. "एक्झिट पोलवर माझा विश्वासच नाही. हा सगळा आकड्यांचा खेळ आहे", असं प्रतिभा धंगेकर म्हणाल्या.

खरतर मी निवडणुकीच्या प्रचारासाठी मतदारसंघात फिरत होते. त्यावेळी मतदारांनी आम्हाला चांगला प्रतिसाद दिला. आम्ही तुमच्या पाठीशी आहोत असा विश्वास त्यांनी दिला. त्यामुळे निवडणुकीत नक्कीच आमचा विजय होणार. आमचे साहेब आज पुण्याचे खासदार होणार, असा विश्वास प्रतिभा धंगेकर यांनी व्यक्त केला आहे.

पुण्यात निकालाआधीच झळकले विजयाचे बॅनर्स

पुणे लोकसभा निवडणुकीत मुरलीधर मोहोळ यांचा विजय होणार, असा अंदाज एक्झिट पोल संस्थांनी वर्तवला. त्यानंतर भाजप कार्यकर्त्यांमध्ये उत्साहाचं वातावरण आहे. शहरात ठिकठिकाणी मुरलीधर मोहोळ यांच्या विजयाचे बॅनर्स लागले आहेत. भाजप कार्यकर्त्यांकडून जल्लोषाची तयारी सुरू आहे.

दुसरीकडे रविंद्र धंगेकर हेच पुण्याचे खासदार होणार, असा कॉन्फिडन्स काँग्रेस कार्यकर्त्यांना आहे. त्यांनी देखील विजयाचे बॅनर्स लावले आहेत. पुणे लोकसभा मतदारसंघ हा भाजपचा गड मानला जातो. यंदाही हा गड राखण्यासाठी भाजपने अतोनात प्रयत्न केले आहेत. पंतप्रधान नरेंद्र मोदी यांनी मुरलीधर मोहोळ यांच्या प्रचारासाठी पुण्यात जंगी सभा घेतली होती. दुसरीकडे भाजपच्या गडाला सुरूंच लावण्यासाठी राहुल गांधींनी सभा घेतली होती.