उत्तर भारतीय विकास सेनेने महाराष्ट्र नवनिर्माण सेना या पक्षाची मान्यता रद्द करण्याची मागणी कोर्टात केली आहे. मनसे पक्षाची मान्य रद्द करण्याच्या मुद्द्यावरून राजकीय वर्तुळात चर्चांना उधाण आलं आहे. उत्तर भारतीय विकास सेनेच्या मागणीला मनसैनिकांनी कडाडून विरोध केला. आता उत्तर भारतीय विकास सेनेच्या मागणीवर केंद्रीय मंत्री रामदास आठवले यांनी भाष्य केलं आहे. यावेळी आठवलेंनी राज ठाकरेंवर निशाणा साधण्याची संधी सोडली नाही.

केंद्रीय राज्यमंत्री रामदास आठवले हे पुणे दौऱ्यावर आहेत. पुण्याच्या मावळच्या कामशेत येथे रिपब्लिकन पार्टी ऑफ इंडियाच्या वतीने शिबिराचे आयोजन करण्यात आलंय. या शिबिरानंतर माध्यमांशी बोलताना आठवलेंनी राज ठाकरेंना खोचक टोला लगावला. रामदस आठवले म्हणाले, 'महाराष्ट्र नवनिर्माण सेनेच्या विरोधात एकाने कोर्टात याचिका दाखल केलेली आहे. त्यावर न्यायालय योग्य निर्णय देईल. अनेक पक्ष डोनेशन गोळा करण्यासाठी स्थापन केलेले आहेत. पक्षाच्या नावावर डोनेशन गोळा करायचा, एवढेच काम त्यांचा आहे. मात्र माझ्या पक्षाचे गावागावात शाखा आहेत. कोर्ट सर्व बाजूने विचार करेल आणि मगच निर्णय देईल'.

आठवलेंनी दलित पँथरवरही भाष्य केलं. रामदास आठवले म्हणाले, ' बाबासाहेब आंबेडकर स्वप्न साकार करायचं असेल तर व्यापक पक्षाची उभारणी करणे आवश्यक आहे. तरुणांचा सहभाग या पक्षात असायला पाहिजे. दलित पॅंथर पुन्हा स्थापन करायची का? यावर चर्चा करण्यात आली. पॅंथरही देश देशभर वाढू शकते'.

'सत्तेत माझा सहभाग जरी असला तरी माझ्या कार्यकर्त्यांना न्याय मिळत नाही. अनेक वेळा भाजपच्या वरिष्ठांसोबत चर्चा केली असता फक्त आश्वासन मिळतात. सत्तेचा वाटा मिळत नाही, असं म्हणत आठवले यांनी महायुती सरकारवर लगावला.

'सोमनाथ सूर्यवंशी यांची केस प्रकाश आंबेडकर लढणार आहेत. बाबासाहेब आंबेडकर यांच्या संविधानाचा अपमान झाल्यानंतर आपला उद्रेक व्यक्त करण्यासाठी रस्त्यावर उतरलेल्या त्या तरुणाला मारझोड करण्यात आली. सोमनाथ सूर्यवंशी हा कायद्याचा विद्यार्थी होता. मात्र प्रकाश आंबेडकर त्यांची बाजू मांडतात हे चांगलं आहे. कारण ते चांगले वकील आहेत. ते कोर्टाच्या आतमध्ये बाजू मांडणार आहेत. तर मी कोर्टाच्या बाहेर बाजू मांडणार आहे', असे आठवले म्हणाले.