Uddhav Thackeray Raj Thackeray news : महाराष्ट्राच्या राजकारणातील सर्वात मोठी बातमी समोर आली आहे. उद्धव ठाकरेंना वाढदिवसाच्या शुभेच्छा देण्यासाठी मनसे प्रमुख राज टाकरे मातोश्रीकडे रवाना झाले आहेत. तब्बल दोन दशकानंतर ठाकरे बंधू एकत्र आले होते, त्यानंतर आता दोन्ही नेत्यांमध्ये पुन्हा भेट होत आहे. वाढदिवसाच्या निमित्ताने शिवसेना आणि मनसेच्या युतीची चर्चा होणार का? याबाबत राजकीय वर्तुळात जोरदार चर्चा रंगली आहे.

मराठी अस्मितेच्या मुद्द्यावर राज ठाकरे आणि उद्धव ठाकरे एकत्र आले होते. ५ जुलै रोजी झालेल्या विजयी मेळाव्यात दोन्ही भावांनी एकत्र येत महाराष्ट्रात नव्या राजकीय समि‍करणाचे संकेत दिले होते. गेल्या काही दिवसांपासून मनसे-शिवसेना या युतीच्या फक्त चर्चा सुरू होत्या. पण आता दोन्ही ठाकरे पुन्हा भेटणार असल्यामुळे युतीच्या चर्चेला पुन्हा जोर धरला आहे. मागील अनेक वर्षांपासून राज ठाकरे मातोश्रीवर गेले नव्हते. पण आता उद्धव ठाकरेंना वाढदिवसाच्या शुभेच्छा देण्याच्या निमित्ताने राज ठाकरे मातोश्रीवर जात आहे. कौटुंबिक सोहळ्यासाठी हे दोन्ही ठाकरे एकत्र येत आहेत, पण यामुळे कार्यकर्त्यांमध्ये मोठा उत्साह आहे.

उद्धव ठाकरे यांचा आज ६५ वा वाढदिवस आहे. राज्यभरातून उद्धव ठाकरे यांना वाढदिवसाच्या शुभेच्छा दिल्या जात आहे. शिवसैनिकांमध्ये उत्साह शिगेला पोहचला आहे. त्यातच आता राज ठाकरे यांनी एक पाऊल पुढे टाकत उद्धव ठाकरे यांना शुभेच्छा देण्यासाठी मातोश्रीवर जाण्याचा निर्णय घेतला आहे. दोन्ही ठाकरे पुन्हा एकत्र येणार असल्यामुळे कार्यकर्त्यांमध्ये उत्साह आहे. आगामी स्थानिक स्वराज्य संस्थांच्या निवडणुकीच्या तोंडावर दोन्ही भाऊ एकत्र आल्यास नव्या राजकीय समीकरण होणार आहे.