मुंबईतील प्रसिद्ध लालबागच्या राजाच्या दर्शनाला पुण्याहून आलेल्या एका तरुण भाविकाचा मृत्यू झाल्याची दुर्दैवी घटना घडली आहे. जयदीप मेघराज नेमाडे असे मृत्यू पावलेल्या तरूणाचे नाव आहे. तो लालबाग बिल्डींग नंबर 3 जवळ मित्रांसोबत बसलेला होता. त्यावेळी त्याला अस्वस्थ वाटू लागले. त्याचवेळी त्याला लालबाग गणेश उत्सव मंडळाच्या पदाधिकाऱ्यांनी ॲम्बुलन्सने ग्लोबल हॉस्पिटल येथे दाखल केले. पण तोपर्यंत उशीर झाला होता. डॉक्टरांनी त्याला मृत घोषित केले. प्राथमिक माहितीनुसार त्याचा हृदयविकाराच्या झटक्याने मृत्यू झाल्याची माहिती समोर आली आहे. काळाचौकी पोलीस ठाण्यात अकस्मात मृत्यूची नोंद करण्यात आली आहे.

जयदीप हा यंदाही दरवर्षीप्रमाणे लालबागच्या राजाचे दर्शन घेण्यासाठी मित्रांसोबत मुंबईला आला होता. रांगेत उभे असताना त्याला अस्वस्थ वाटू लागले आणि श्वास घेण्यास त्रास होऊ लागला. त्रास सुरू झाल्याचे त्याने आपल्या मित्राला सांगितले आणि ते सर्वजण रांगेतून बाहेर पडले. परिस्थितीचे गांभीर्य लक्षात घेता पोलिसांनी त्याला तात्काळ मदत कक्षात नेले आणि रुग्णवाहिकेने हलवले. मात्र उपचारापूर्वीच त्याला मृत घोषित केले.

जयदीप मेघराज मेघराज नेमाडे हा जळगाव जिल्ह्यातील शिरसोली रोडवरील जीवनमोती सोसायतील रहिवासी होता. त्याचे वडील मेघराज सुभाष नेमाडे हे नेमाडे ट्रान्सपोर्टचे संचालक आहेत. जयदीप कुटुंबातील एकुलता एक मुलगा होता. त्याच्या आईचे 12 वर्षांपूर्वी निधन झाले होते. जयदीप हा उच्चशिक्षित मुलगा होता आणि तो पुण्यात नोकरी करत होता.