अक्षय बडवे, पुणे

पुण्यातून धक्कादायक बातमी समोर आली आहे. एका तरुणाने मैत्रिणीची हत्या करून स्वतः देखीलआत्महत्या केल्याची घटना घडली आहे. हे दोघेही पुण्यातील ससून रुग्णालयात काम करायचे. प्रेम संबंधातून ही हत्या झाल्याचा प्राथमिक अंदाज पोलिसांनी वर्तवला आहे. दरम्यान या घटनेने परिसरात भीतीचे वातावरण पसरले आहे. मृत तरुणीच्या कुटुंबियांवर दुःखाचा डोंगर कोसळला आहे. गणेश काळे (वय २१, रा. बीड) आणि दिव्या निगोश (वय २०, रा. येरवडा) असे मृतदेह आढलेल्या दोघांची नावे आहेत.

मिळालेल्या माहितीनुसार, पुण्यातील संगमवाडी येथे गणेशने दिव्याची(Divya Nigosh) हत्या केली. दिव्या ही मूळची पुण्यातील विमानतळ भागातील वास्तव्यास असून तिचे वडील पोलिस कर्मचारी आहेत. गणेश ( Ganesh Kale ) हा मूळचा बीडचा आहे. दोघेही ससून रुग्णालयात लॅब टेक्नेशियन म्हणून नोकरी करत होते. संबंधित मुलगी ही बेपत्ता झाल्याची तक्रार मुलीच्या कुटुंबीयांनी कोरेगाव पोलीस ठाण्यात दाखल करण्यात आली होती.

पोलिसांनी माहिती मिळताच तरुणीचा तपास सुरु केला. तपासात दिव्याचा मृतदेह गणेशच्या राहत्या खोलीत तर त्याचवेळी गणेशचा मृतदेह तळेगाव रेल्वे ट्रॅकवर आढळून आला आहे. या प्रकरणाचा तपास करत असताना पोलिसांना धक्कादायक बाब उघडकीस आली. गणेशने आधी दिव्याची हत्या केली, नंतर तळेगाव रेल्वे ट्रॅकवर जाऊन स्वतः आत्महत्या केली. या प्रकरणात दोघांचाही मृत्यू झाला आहे.

प्राथमिक अंदाजानुसार, ही हत्या प्रेमसंबंधातून झाल्याची शक्यता पोलिसांनी वर्तवली आहे. पोलिसांनी दोन्ही मृतदेह ससून रुग्णालयात शवविच्छेदनासाठी पाठविले आहेत. मुलीच्या नाकावर आणि चेहऱ्यावर व्रण आहेत. या घटनेनंतर परिसरात खळबळ उडाली आहे. दरम्यान पोलीस या घटनेचा तपास करत असून या हत्येमागचं मूळ कारण अद्याप समोर आलेलं नाही. दिव्याच्या मृत्यूनंतर तिच्या कुटुंबियांवर शोककळा पसरली आहे.