सागर आव्हाड / अक्षय बडवे, पुणे | साम प्रतिनिधी

ढगांनी सकाळपासूनच गर्दी केली असतानाच सूर्य माथ्यावर येता येता वरूणराजानं पुण्यावर बरसात केली. पुण्यासह उपनगरे आणि मध्यवर्ती भागात पावसानं जोरदार हजेरी लावली. घामाच्या धारांनी हैराण झालेल्या पुणेकरांना पावसानं ओलेचिंब केलं. पण दुसरीकडं जोरदार पावसामुळं वाहनचालकांची तारांबळ उडाली. हवामान विभागानं पुढील दोन ते तीन दिवसांसाठी अंदाज वर्तवला आहे. पुणे शहरात पुढील दोन ते तीन दिवस पावसाच्या सरी कोसळणार आहेत. त्यामुळं पुणेकरांना पुढील २४ तास अलर्ट राहावं लागणार आहे. पावसाचा अंदाज घेऊन घराबाहेर पडावं लागणार आहे.

पुणे शहरातील सर्वच भागांत सकाळपासूनच ढगाळ वातावरण होते. काही वेळानंतर अनेक भागांत पावसाला सुरुवात झाली. शिवाजीनगर, डेक्कन, कोथरूड, हडपसर, कात्रज, बाणेर, औंध, हिंगणे, पिंपरी-चिंचवड आणि वाघोली आदी भागांत मध्यम ते जोरदार पाऊस बरसला. धायरी, नऱ्हे, सिंहगड रोड परिसरातही सरी कोसळल्या. काही भागांत तर विजांसह पावसानं हजेरी लावली. त्यामुळं काही वेळ वीजपुरवठा खंडित झाला होता. तर वाहतूक यंत्रणाही विस्कळीत झाली होती. काही भागांत रस्त्यांवर पाणी साचलं. त्यामुळं वाहतुकीस अडथळा निर्माण झाला होता.

IMD Alert : २४ तास पुण्यासाठी महत्वाचे

हवामान विभागानं वर्तवलेल्या प्राथमिक अंदाजानुसार, पुढील २४ तासांत पुणे आणि परिसरात हलका आणि मध्यम स्वरुपाचा पाऊस पडू शकतो. सक्रीय होत असलेला मान्सून आणि स्थानिक हवामानातील बदल यामुळे पाऊस पडल्याचे सांगितले जात आहे. पावसामुळं इथलं तापमान ३ ते ४ अंश सेल्सियसनं घसरलं आहे. प्रचंड उकाड्यानं हैराण झालेल्या पुणेकरांना काही प्रमाणात दिलासा मिळाला आहे.

Monsoon : यंदा लवकरच मान्सून

मागील आठवडाभरापासून राज्याच्या बऱ्याचशा भागात अवकाळी पावसानं हजेरी लावली आहे. ऐन उन्हाळ्यात पावसाच्या एन्ट्रीनं उकाड्यानं हैराण झालेल्या नागरिकांना दिलासा मिळाला असला तरी, ग्रामीण भागात शेती, फळबागांचं नुकसान झालं आहे. यंदा मान्सूनही लवकरच हजेरी लावणार आहे. साधारण १ जून रोजी केरळमध्ये मान्सूनचे आगमन होते. मात्र, यावर्षी २७ मे रोजीच केरळमध्ये धडकेल, असा अंदाज आहे. महाराष्ट्रातही मान्सूनचे आगमन लवकर होण्याचे संकेत असून, पाऊसही लवकरच बरसेल, असा अंदाज आहे.