अक्षय बडवे, साम टिव्ही प्रतिनिधी

पुण्यातील वाहतूक विभागात कार्यरत असलेल्या पोलीस हवालदाराने गळफास घेऊन आत्महत्या केल्याची धक्कादायक घटना समोर आली आहे. घटनेच्या दिवशी मुलं शाळेत गेले होते. तर, पत्नी दौंडला गेल्या होत्या. मुलं शाळेतून आल्यानंतर त्यांनी दार ठोठावला. मात्र, कुणीच दार उघडले नाही. शेजाऱ्यांनी पोलिसांना याची माहिती दिली. पोलिसांनी दार उघडले. त्यानंतर ही बाब उघडकीस आली. या घटनेमुळे पुणे पोलिस दलात मोठी खळबळ उडाली आहे.

राजेंद्र विलास गायकवाड (वय ४२) असे आत्महत्या केलेल्या पोलिस कर्मचाऱ्याचे नाव आहे. गायकवाड हे सध्या पुणे शहर वाहतूक शाखेच्या नियंत्रण कक्षात कार्यरत होते. शनिवारी साप्ताहिक सुट्टी असल्याने ते घरीच होते. त्यांची पत्नी दौंड येथे गेल्या होत्या, तर १२ आणि १४ वर्षांचे मुलगा व मुलगी शाळेत गेले होते.

सकाळपासून गायकवाड यांच्या पत्नीला त्यांनी वारंवार फोन केला. मात्र, त्यांनी कॉलला काही प्रतिसाद दिला नाही. दुपारी मुलं शाळेतून परत आल्यावर घर बंद असल्याचे त्यांच्या लक्षात आले. त्यांनी वारंवार दार ठोठावले. त्यानंतर त्यांनी शेजाऱ्यांनी तात्काळ पोलिसांना याची माहिती दिली. पोलिसांनी दार उघडले.

तेव्हा समोर गायकवाड गळफास घेतलेल्या अवस्थेत आढळले. याची माहिती त्यांच्या पत्नीला देण्यात आली. त्यानंतर त्यांनी तातडीने घराजवळ धाव घेतली. विमानतळ पोलिसांनी आकस्मिक मृत्यूची नोंद करण्यात आली आहे. त्यांच्यामागे पत्नी आणि दोन मुले असा परिवार आहे. या घटनेनंतर परिसरात खळबळ उडाली आहे.