सचिन जाधव, साम टीव्ही, प्रतिनिधी

Shivjayanti Pune News : दरवर्षी पुण्यात शिवजयंतीचा उत्सव मोठ्या उत्साहात साजरा केला जातो. उद्याही पुणे शहर आणि परिसरात शिवजंयती साजरी केली जाणार आहे. या निमित्ताने पुण्यात उद्या (१९ फेब्रुवारी) पीएमपी मार्गात बदल करण्यात आले आहेत. भवानी पेठेतील भवानी माता मंदिर येथून शिव प्रतिमेची मिरवणूक निघणार आहे.

शिवजयंतीच्या पार्श्वभूमीवर पुण्यात छत्रपती शिवाजी महाराज रस्ता, लक्ष्मी रस्ता इथून मिरवणुका निघत असल्यामुळे पोलिसांनी वाहतुकीमध्ये बदल केले आहेत. उद्या दुपारी चारच्या सुमारास भवानी माता मंदिराकडून शिवाजी महाराज यांची मिरवणूक निघणार आहे. छत्रपती शिवाजी पुतळा येथे मिरवणुकीची सांगता होणार आहे.

या मिरवणुकीमुळे शिवाजी रस्ता आणि लक्ष्मी रस्ता या मार्गांवरुन जाणाऱ्या बसचा मार्ग बदलण्यात येणार आहे. या दोन्ही मार्गांवरील बसेस जंगली महाराज रस्ता, डेक्कन टिळक चौकाच्या पुढे कुमठेकर रस्ता, विश्रामबागवाड मंडई मार्गे स्वारगेट चौकात येऊन पुढे नेहमीच्या मार्गाने जातील.

लक्ष्मी रस्ता वाहतुकीस बंद झाल्यावर या मार्गावरील बस पुणे स्टेशन मार्गे पोलीस आयुक्त कार्यालय महात्मा गांधी व स्थानक गोळीबार मैदान स्वारगेट व पुढे नेहमीच्या मार्गाने जातील. फडके हळद दारूवाला फुल वाहतुकीस बंद झाल्यानंतर या मार्गावर बस पुणे स्टेशन कडे जाताना कुंभारवाडा जुना बाजार मंगळवार पेठ या मार्गाने जातील.