पुण्यातून एक संतापजनक घटना समोर आली आहे. लग्नाला नकार दिल्याच्या रागातून एका तरूणाने तरूणीचे शरीरसंबंध ठेवत असताना व्हिडिओ शूट करून पॉर्न साईटवर व्हायरल केल्याची धक्कादायक बाब उघडकीस आली आहे. या प्रकरणाची माहिती तरूणीला मिळाल्यानंतर तिने थेट पोलीस ठाणे गाठत तक्रार दाखल केली. याप्रकरणी पोलिसांनी आरोपीविरोधात गुन्हा दाखल केला आहे. हा प्रकार ३० डिसेंबर २०२३ ते १२ मे २०२५ दरम्यान घडल्याची माहिती समोर आली आहे.

पोलिसांकडून मिळालेल्या माहितीनुसार, पीडित तरूणी एका कंपनीत मॅनेजर म्हणून कार्यरत होती. तर, आरोपी विनय कुलकर्णी हा एक अॅटोमोबाईल इंजिनिअर आहे. २ वर्षांपूर्वी दोघांची ओळख झाली. हळूहळू मैत्री झाली. मैत्रीचे रूपांतर प्रेमात झाले. प्रेमसंबंधात असताना दोघांच्या सहमतीने शरीरसंबंधही झाले. मात्र, शरीरसंबंधाच्यावेळी आरोपीने शरीरसंबंधाचे काही व्हिडिओ तिच्या नकळत शुट केले.

काही काळानंतर दोघांचे ब्रेकअप झाले. पीडितेने लग्नाला नकार दिल्यामुळे ब्रेकअप झाल्याची माहिती समोर आली आहे. त्यानंतर दोघांनीही संपर्क तोडला. याकाळात तरूणीच्या मैत्रिणीला पॉर्न साईटवर तिचा व्हिडिओ दिसला. तिने याबाबत संबंधित तरूणीला याची माहिती दिली. त्यानंतर तरूणीने थेट अलंकार पोलीस ठाणे गाठत आरोपीविरोधात तक्रार दाखल केली.

पोलिसांनी पीडित मुलीने दाखल केलेल्या तक्रारीनुसार, आरोपी विनय कुलकर्णीवर गुन्हा दाखल केला. या प्रकरणाचा पुढील तपास वरिष्ठ पोलीस निरीक्षक सुनिता रोकडे यांच्या मार्गदर्शनाखाली सुरू असून, आरोपीविरोधात लवकरच कारवाई केली जाईल, अशी माहिती समोर आली आहे.