रेल्वे प्रवाशांसाठी महत्त्वाची बातमी! हडपसर–घोरपडी तिसऱ्या रेल्वेमार्गाच्या कामासाठी पुणे आणि हडपसर यार्डमध्ये सुरू असलेल्या कामाचा परिणाम रेल्वे वाहतुकीवर होणार आहे. शनिवार आणि रविवार, म्हणजेच ३ आणि ४ ऑक्टोबर रोजी पुणे विभागातून धावणाऱ्या अनेक रेल्वे गाड्यांच्या वेळापत्रकात बदल करण्यात आला आहे. या दोन दिवसांत काही लांब पल्ल्यांच्या गाड्यांचे मार्ग बदलण्यात आले असून, अनेक गाड्यांच्या फेऱ्या रद्द करण्यात आल्या आहेत.

रेल्वे प्रशासनाकडून करण्यात आलेल्या बदलांनुसार, काही गाड्या पुणे स्थानकाऐवजी खडकी, दौंड, कुर्डुवाडी, सोलापूर, सातारा किंवा जेजुरीपर्यंतच धावणार आहेत. त्यामुळे नियमितपणे पुणे स्थानकावर ये-जा करणाऱ्या प्रवाशांना पर्यायी प्रवासाची व्यवस्था करावी लागू शकते. पुणे–नागपूर, पुणे–सोलापूर, नागपूर–पुणे, पुणे–बीड आणि अमरावती–पुणे या मार्गांवरील काही गाड्यांच्या फेऱ्यांवर परिणाम झाला आहे. याशिवाय पुणे–दौंड आणि पुणे–बारामती मार्गावरील डेमूच्या काही फेऱ्याही रद्द करण्यात आल्या आहेत.

दरम्यान, ४ ऑक्टोबर रोजी पुणे–मुंबई एक्स्प्रेससह पुणे–सोलापूर, पुणे–कोल्हापूर, पुणे–शिर्डी, पुणे–नागपूर आणि पुणे–अमरावती या गाड्यांच्या सेवांवरही परिणाम होणार आहे. पुणे–लोणावळा उपनगरीय मार्गावरील काही फेऱ्यादेखील रद्द करण्यात आल्या आहेत.

तिसऱ्या रेल्वेमार्गाच्या कामामुळे रेल्वे वाहतूक सुरळीत ठेवण्यासाठी हे बदल करण्यात आले आहेत. मात्र, अचानक झालेल्या बदलांमुळे प्रवाशांची गैरसोय होण्याची शक्यता आहे. त्यामुळे प्रवाशांनी तिकीट, गाडीचा मार्ग आणि अंतिम स्थानकाची माहिती तपासूनच प्रवासाचे नियोजन करावे, करण्याचे आवाहन रेल्वेने केले आहे.