Pune Police Conduct Sting Operation : पुण्यात एका डमी डिलिव्हरी बॉयच्या स्टिंग ऑपरेशननंतर निष्काळजीपणा दाखवणाऱ्या पोलिस कर्मचाऱ्यावर पुणे पोलिस दलाने कठोर कारवाईचा बडगा उगारला आहे. तक्रारदाराची तक्रार नोंदवून घेण्याऐवजी त्यालाच फुकटचा सल्ला देऊन माघारी पाठवणे एका पोलिस कर्मचाऱ्याला भलतेच महागात पडले आहे. या प्रकरणी वरिष्ठ अधिकाऱ्यांनी संबंधित कर्मचाऱ्याची दोन वर्षांसाठी वेतनवाढ रोखण्याची दंडात्मक कारवाई केली आहे. किसन साळुंके असे कारवाई झालेल्या पोलिस कर्मचाऱ्याचे नाव असून ते सध्या विमानतळ पोलिस ठाण्यात कार्यरत आहेत.

नेमकं काय घडलं?

हा संपूर्ण प्रकार २१ जून रोजी घडला होता. त्यावेळी पोलिस कर्मचारी साळुंके हे मुंढवा पोलिस ठाण्यात कार्यरत होते. पुणे शहर पोलिसांच्या वरिष्ठ अधिकाऱ्यांनी पोलिस ठाण्यांच्या कारभाराची पडताळणी करण्यासाठी एक 'डमी तक्रारदार' डिलिव्हरी बॉय म्हणून तयार केला आणि त्याला मुंढवा पोलिस चौकीत पाठवले. रॅश ड्रायव्हिंग करून मला शिवीगाळ व दमदाटी झाली, अशी तक्रार या डमी तक्रारदाराने मांडली. मात्र तेथील महिला पोलिस हवालदाराने तक्रार न घेता त्याला थेट मुंढवा पोलिस ठाण्यात जाण्यास सांगितले.

पोलीस कर्मचाऱ्याचा फुकटचा सल्ला भोवला!

त्यानंतर डमी तक्रारदाराने मुंढवा पोलिस ठाणे गाठले. तिथे ड्युटीवर असलेले कर्मचारी किसन साळुंके यांच्याकडे त्याने आपली आपबिती सांगितली. मात्र, तक्रार नोंदवून घेण्याऐवजी साळुंके यांनी, "डिलिव्हरी बॉयचे काम करताना जरा सावधानतेने गाडी चालवत जा," असा सल्ला देऊन तक्रारदाराची बोळवण केली आणि त्याला माघारी पाठवले.

वरिष्ठांची कारवाई; २ वर्षे वेतनवाढ बंद!

हा संपूर्ण प्रकार वरिष्ठांच्या थेट निदर्शनास आल्यानंतर कर्तव्यदक्षतेचा अभाव आणि बेजबाबदारपणा दाखवल्याप्रकरणी साळुंके यांना तात्काळ कारणे दाखवा नोटीस बजावण्यात आली. त्यांनी दिलेला खुलासा अस समाधानकारक आढळल्याने, परिमंडळ ६ चे पोलिस उपआयुक्त जीवन बेनिवाल यांनी साळुंके यांची २ वर्षांसाठी वेतनवाढ स्थगित (शिक्षेची कारवाई) करण्याचे आदेश दिले आहेत. या धडक कारवाईमुळे पुणे पोलिस वर्तुळात मोठी खळबळ उडाली आहे.