पुण्यातून एक धक्कादायक बातमी समोर येत आहे. राष्ट्रीय संरक्षण प्रबोधिनीमध्ये शिक्षण घेणाऱ्या विद्यार्थ्यानं आत्महत्या केली आहे. हा तरूण मुळचा उत्तर प्रदेशमधील रहिवासी असल्याची माहिती आहे. आज पहाटे तरूणानं खोलीत गळफास लावून आयुष्य संपवलं. दरम्यान, आत्महत्या करण्यामागचं कारण काय? याची अद्याप माहिती समोर आलेली नाही. सध्या तपास सुरू आहे.

अतंरिक्ष कुमार (वय वर्ष १८) असे तरूणाचे नाव आहे. हा तरूण मुळचा उत्तर प्रदेशातील लखनौ जिल्ह्यातील एका गावातील रहिवासी आहे. त्याचे वडील माजी सैनिक आहेत. मिळालेल्या माहितीनुसार, तो सध्या पुण्यातील राष्ट्रीय संरक्षण प्रबोधिनी (NDA) मध्ये शिक्षण घेत होता. जुलै महिन्यात त्याने एन डी एमध्ये प्रवेश घेतला होता. अंतरिक्ष पहिल्या सत्रात शिकत होता.

पोलिसांनी दिलेल्या प्राथमिक माहितीनुसार, आज पहाटे अंतरिक्षने त्याच्या खोलीतील बेडशीटने गळफास लावून आत्महत्या केली. याची माहिती मिळताच पोलिसांना कळवण्यात आले. पोलिसांनी सध्या मृतदेह ताब्यात घेतला आहे. तसेच अंतरिक्षच्या कुटुंबालाही माहिती देण्यात आली.

अंतरिक्षने आत्महत्या का केली? आत्महत्या करण्यामागचं कारण काय? याची माहिती अद्याप समोर आलेली नाही. त्याच्या खोलीतून सुसाईड नोटही सापडली नाही. सध्या उत्तमनगर पोलिसांकडून अधिक तपास सुरू आहे. दरम्यान, या घटनेनंतर परिसरात खळबळ उडाली आहे. या घटनेनंतर अतंरिक्ष कुमार या तरूणाच्या कुटुंबावर दुखा:चा डोंगर कोसळला आहे.