पुण्यातील प्रसिद्ध पेशवेकालीन ओंकारेश्वर मंदिरात चोरी झाल्याची घटना उघडकीस आली आहे. शनिवार पेठेतील ओकांरेश्वर मंदिरामधील दानपेटी चोरट्यांनी फोडली. चोरट्यांनी दानपेटीतील ६ हजार रुपयांची रोकड लंपास केली. विश्रामबाग पोलिस याप्रकरणाचा तपास करत आहेत. या घटनेमुळे पुण्यात खळबळ उडाली आहे.

मिळालेल्या माहितीनुसार, ओंकारेश्वर मंदिरात शनिवारी चोरट्याने गाभाऱ्यातील दानपेटीचे कुलूप तोडून ६ हजार रुपये चोरून नेले. हा प्रकार उघडकीस आल्यानंतर कौस्तुभ गाडे यांनी विश्रामबाग पोलिस ठाण्यात तक्रार दाखल केली. या तक्रारीनंतर विश्रामबाग पोलिस ठाण्यात चोरट्यांविरोधात गुन्हा दाखल करण्यात आला आहे. पोलिसांनी मंदिराच्या आवारातील सीसीटीव्ही फुटेज ताब्यात घेतले असून पुढील तपास सुरू आहे.

दरम्यान, नाशिकच्या शिवाजीनगर येथील कुबेर भंडारे महादेव मंदिराच्या दानपेटीवर चोरट्याने डल्ला मारल्याची बातमी सोमवारी घडली होती. सोमवारी पहाटे तीन वाजेच्या सुमारास ही घटना घडली. मंदिरातले सहा हजार रुपयांपेक्षा जास्त दान या चोरट्यांनी लंपास केले. चोरीची घटना सीसीटीव्हीमध्ये कैद झाल्यामुळे उघडकीस आली.

गंगापूर पोलिस ठाण्यामध्ये या चोरीप्रकरणी चोरट्याविरोधात गुन्हा दाखल केला आहे. शहरात अनेक मंदिरात अशाच पद्धतीच्या चोरांच्या घटना वाढल्या आहेत. याआधी देखील सातपूर परिसरामध्ये एका मंदिरात चोरट्याने दानपेटीवर जायला मारला होता. या चोरीच्या घटनांवर लवकरात लवकर आळा घालावा आणि चोरट्यांना पोलिसांनी लवकर पकडावे अशी मागणी नागरिकांनी केली आहे.