Pune News : महाराष्ट्र नवनिर्माण सेनेकडून पुण्यातील राष्ट्रीय व खासगी बँकांमध्ये मराठी भाषेचा वापर करण्यात यावा अशी मागणी होत आहे. या संदर्भात मनसे पदाधिकाऱ्यांनी बँकांना निवदेन केले आहे. याची अंमलबजावणी न केल्यास तीव्र आंदोलन करु असा इशाराही त्यांनी दिला आहे.

रिझर्व्ह बँकेने २०१४ मध्ये परिपत्रक काढले होते. या परिपत्रकाद्वारे खातेदारांना त्या-त्या राज्यातील भाषेनुसार सेवा द्यावी असे रिझर्व्ह बँकेने म्हटले होते. मराठी भाषा ही राजभाषा आहे, आपल्या राज्याची, महाराष्ट्राची अधिकृत भाषा आहे, तेव्हा तिचा वापर कामकाजात करावा अशी मागणी मनसेने केली आहे.

मनसेने पुणे शहर आणि परिसरातील राष्ट्रीय आणि खासगी बँकांमध्ये खातेदाराशी मराठी भाषेत संवाद साधावा, कागदपत्रे मराठीत असावीत आणि बँकिंग सेवा मराठी भाषेत उपलब्ध करुन द्यावी असे निवदेन पुण्यातील ९ बँकांना गुरुवारी (२३ जानेवारी) दिली आहे. जर या बँकांनी येत्या १५ दिवसांत याची अंमलबजावणी केली नाही तर त्यांच्याविरुद्ध आंदोलनाचा इशाराही मनसेकडून देण्यात आला आहे.

महाराष्ट्रात मागील काही दिवसांपासून मराठी माणसांची, मराठी भाषेची गळाचेपी होत आहे. मराठी बोलणाऱ्यांवर परप्रांतीयांकडून अन्याय होत असल्याच्या अनेक घटना घडत आहेत. काही दिवसांपूर्वी मुंब्रामध्ये मराठी बोलणाऱ्या तरुणाला अमराठी जमावाने त्रास दिला होता. कल्याणमध्ये परप्रांतीय नागरिकांकडून मराठी नागरिकाला मारहाण झाली होती.