अक्षय बडवे, साम टीव्ही, प्रतिनिधी

पुणे स्वारगेट बस डेपो बलात्कार प्रकरणामुळे राज्यभरात संतापाची लाट उसळली. या प्रकरणामुळे पुण्यात महिला सुरक्षित आहे का असा प्रश्न उपस्थित करण्यात आला. हे प्रकरण ताजं असताना पुण्यातल्या एका घटनेमुळे मोठी खळबळ उडाली आहे. फोटो व्हायरल करण्याची धमकी देत एका विद्यार्थिनीचा गैरफायदा उचलल्याची घटना उघडकीस आली आहे.

पीडित तरुणीने दिलेल्या माहितीनुसार, पुण्यातील भारती विद्यापीठ परिसरात ही तरुणी राहते. काही दिवसांपूर्वी सोशल मीडियावर एका तरुणासोबत तिची ओळख झाले. या तरुणाने फोटो व्हायरल करण्याची धमकी देत पीडितेचा गैरफायदा घेतला आणि तिच्याशी शरीरसंबंध ठेवले. त्यानंतर त्याने लग्न करण्यासाठी पीडितेमागे तगादा लावला.

'लग्न न केल्यास ठार मारण्याची धमकी तरुणाने दिल्याचे पीडितेने सांगितले आहे. या प्रकारानंतर तरुणीने थेट पोलीस ठाणे गाठले आणि तक्रार नोंदवली. २६ फेब्रुवारी रोजी या प्रकरणी गुन्हा दाखल झाला. मात्र गुन्हा दाखल झाल्यापासून बरेच दिवस झाले तरीही आरोपीवर कुठलीच कारवाई झाली नाही', अशी माहिती पीडितेने दिली आहे.

'आरोपी अजूनही मोकाट आहे. मी गुन्हा मागे घ्यावा यासाठी तो माझ्यावर दबाव टाकत आहे. सोशल मीडियाच्या माध्यमातून त्याने कोयत्याचे फोटो पाठवून ठार मारण्याची धमकी दिली आहे. एकीकडे पोलीस कारवाई करत नाहीत आणि दुसरीकडे आरोपी धमक्या देतो आहे. यामुळे माझ्या जीवाला धोका आहे. माझा खून झाल्यानंतरच दखल घेणार का?' असे पीडितेने म्हटले आहे.

दरम्यान यावर पोलिसांनीही आपली बाजू मांडली आहे. भारती विद्यापीठ पोलिसांनी या प्रकरणी आरोपीचा शोध घेणे सुरु असल्याचे सांगितले आहे. आरोपीचा मोबाईल बंद असल्याने त्याचा शोध घेण्यात अडचणी येत असल्याची माहिती वरिष्ठ पोलीस निरीक्षक सावळाराम साळगावकर यांनी दिली आहे.