पुणे - मनसे अध्यक्ष राज ठाकरे यांची आज पुण्यात सभा होणार आहे. आज सकाळी 10 वाजता ही सभा गणेश कला क्रीडा मंच सभागृहात होणार आहे. स्वारगेट परिसरातील बंदीस्त सभागृहात या सभेचे आयोजन करण्यात आले आहे. राज ठाकरे (Raj Thackeray) गेल्या काही दिवसांपासून राज्य सरकारवर आपली तोफ डागत आहे. त्यामुळे आजच्या या सभेत राज ठाकरे काय बोलणार याकडे सर्व्यांचे लक्ष लागलेले आहे. सुरक्षेच्या कारणास्तव या परिसरात मोठा पोलीस बंदोबस्त तैनात करण्यात आला आहे. मोठ्या प्रमाणात कार्यकर्ते येण्याचा अंदाज वर्तवण्यात येत आहे. सोबतच आगामी निवडणुकांच्या संदर्भात देखील राज ठाकरे हे कार्यकर्त्यांशी संवाद साधण्याची शक्यता आहे.

हे देखील पाहा -

राज ठाकरे यांच्या या सभेसंदर्भात संभ्रम निर्माण झाला होता. या सभेबाबात बाळा नांदगावकर यांच्यासोबत राज ठाकरे यांनी बैठक घेतली होती. या बैठकीनंतर बाळा नांदगावकर यांनी सांगितलं होतं की, नदीपात्रात सभा होणार होती मात्र हवामान खात्याचा अंदाज पाहता आता पाऊस कधीही येऊ शकतो आणि अचानक पाऊस आला तर हजारो लोकांना त्रास होईल. यामुळे ही सभा 21 ऐवजी 22 मे रोजी गणेश कला क्रीडा मंच इथे घेण्याचा निर्णय घेण्यात आला.

दरम्यान, राज ठाकरे यांची ही सभा गेल्या तीन सभांसारखीच वादळी ठरण्याची शक्यता आहे. कारण मुख्यमंत्री उद्धव ठाकरे यांची काही दिवसांपूर्वीच बीकेसीत सभा पार पडली या सभेत त्यांनी राज ठाकरेंना पिक्चरमधल्या मुन्नाभाईची उपमा देत टोला लगावला होता. तर काहींना बाळासाहेब झाल्यासारखे वाटते कधी मराठीवर बोलतात. कधी भगवी शाल घेवून फिरतात असं म्हणत राज ठाकरे यांच्यावर जोरदार टीका केली होती. त्यामुळे राज ठाकारे या मुद्द्यावर काय बोलतात याकडे सर्वांचे लक्ष लागलेले आहे.

Edited By - Shivani Tichkule