सचिन जाधव, साम टीव्ही

पुणे शहराच्या सार्वजनिक वाहतूक व्यवस्थेला मोठा दिलासा देणाऱ्या मेट्रो प्रकल्पाच्या स्वारगेट ते कात्रज या विस्तारित मार्गिकेच्या कामाला वेग आला आहे. या 5.45 किमी लांबीच्या पूर्णतः भुयारी मार्गिकेसाठी आवश्यक असलेल्या टनेल बोरिंग मशीन साठी लागणाऱ्या पहिल्या टनेल सेगमेंट कास्टिंग कामाचे उद्घाटन करण्यात आले. महामेट्रोचे व्यवस्थापकीय संचालक श्रावण हर्डीकर यांच्या हस्ते तसेच वरिष्ठ अधिकाऱ्यांच्या उपस्थितीत या कामाचा शुभारंभ झाला. या मार्गिकेचे बांधकाम अत्याधुनिक टनेल बोरिंग मशीनद्वारे करण्यात येणार असून बोगद्याच्या मजबूतीसाठी प्रीकास्ट आरसीसी सेगमेंटचा वापर होणार आहे.

स्वारगेट ते कात्रज या दोन्ही बाजूंच्या बोगद्यांची एकूण लांबी सुमारे 9.7 किमीन असून यासाठी एकूण 6,993 रिंग्स तयार केल्या जाणार आहेत. या रिंग्सच्या माध्यमातून बोगद्याची संरचना मजबूत आणि सुरक्षित करण्यात येणार आहे. या महत्त्वाच्या मार्गिकेवर एकूण पाच भुयारी स्थानके प्रस्तावित आहेत. त्यामध्ये मार्केट यार्ड, बिबवेवाडी, पद्मावती, बालाजीनगर आणि कात्रज या स्थानकांचा समावेश आहे.

हा प्रकल्प पूर्ण झाल्यानंतर पुण्यातील वाहतूक कोंडी कमी होण्यास मोठी मदत होणार असून, शहरातील नागरिकांना जलद, सुरक्षित आणि पर्यावरणपूरक प्रवासाचा पर्याय उपलब्ध होणार आहे.

या मार्गावर एकूण पाच महत्त्वाची भुयारी स्थानके असतील:

१. मार्केट यार्ड

२. बिबवेवाडी

३. पद्मावती

४. बालाजीनगर

५. कात्रज