दिलीप कांबळे, साम टीव्ही, प्रतिनिधी

पुणे जिल्ह्यातील पिंपरी-चिंचवडमध्ये वैष्णवी हगवणेच्या मृत्यूने राज्यामध्ये विवाहित महिलांना होणारा छळ हा मुद्दा ऐरणीवर आला आहे. मारहाण, चारित्र्याचा संशय यामुळे वैष्णवी त्रासली होती. हुंड्यापायी होणाऱ्या त्रासाला कंटाळून वैष्णवीने आत्महत्या केल्याचे म्हटले जात आहे. वैष्णवीने आत्महत्या केली नाही, तिची हत्या झाल्याचे वैष्णवीच्या आईवडिलांनी म्हटले आहे. हे प्रकरण ताजे असताना पुण्यात अशीच एक घटना घडली आहे.

मिळालेल्या माहितीनुसार, पुण्यातील वडगाव मावळमध्ये चारित्र्याचा संशयावरून पतीने पत्नीची हत्या केली आहे. दगडाने ठेचून पतीने त्याच्या पत्नीचा खून केल्याचे उघडकीस आले आहे. सदर घटना कोंडिवडे अंदर मावळ हद्दीत घडली आहे. हा प्रकार समोर आल्यानंतर परिसरात रोष व्यक्त केला जात आहे.

सोनाबाई अशोक वाघमारे (वयवर्ष ३३) असे मृत महिलेचे नाव आहे, तिच्या पतीचे नाव अशोक बारकु वाघमारे (वयवर्ष ४०) असे आहे. मावळ तालुक्यातील कोंडिवडे येथे दोघे राहत होते. चारित्र्याच्या संशयावरुन अशोक यांनी दगडाने ठेचून सोनाबाई यांची हत्या केली. अशा घटना घडत असल्यामुळे महिलांची सुरक्षा आणि न्याय हे मुद्दे चर्चेत आहेत.

२३ वर्षांच्या वैष्णवी हगवणेचा जीव सासरी होणाऱ्या छळामुळे गेला. हुंड्यासाठी तिच्या सासरकडच्या मंडळींनी वैष्णवीचे हाल केले होते. १६ मे रोजी तिने छळाला कंटाळून स्वत:ला संपवले. या प्रकरणी पोलिसांनी वैष्णवीचा नवरा शशांक, सासू लता आणि नणंद करिष्मा यांना अटक केले होते. आज २३ मे रोजी तिचा सासरा राजेंद्र आणि दीर सुशील यांना पोलिसांनी ताब्यात घेतले.