पुणे : पुणे-सोलापूर राष्ट्रीय महामार्गावरून हातभट्टीची दारू विक्री करण्यासाठी निघालेल्या एकाला लोणी काळभोर पोलिसांनी अटक केली आहे. या कारवाईत पोलिसांना २ लाख ७८ हजारांचा मुद्देमाल जप्त करण्यात यश आलं आहे. मुबारक जाफर गड्डे (वय ४३, पाषाणकर बाग, लोणी काळभोर, ता.हवेली) असं अटक करण्यात आलेल्या आरोपींची नावे आहेत.

पोलिसांनी कुंजीरवाडी (ता. हवेली) ग्रामपंचायत हद्दीतील बारा फाटा परिसरात सापळा रचला. तेव्हा पुणे-सोलापूर राष्ट्रीय महामार्गावरून पुण्याच्या दिशेने जाणारी एक चारचाकी मारुती सुझुकी कंपनीची अल्टो कार पकडली. त्या गाडीमध्ये हातभट्टी गावठी दारु भरलेली एकूण ८ कॅन आढळून आले. त्यात एकूण २८० लीटर दारु मिळून आली आहे.

पोलिसांनी गाडीसह सुमारे २ लाख ७८ हजारांचा मुद्देमाल जप्त केला आहे. तर आरोपी मुबारक गड्डे याला अटक करून त्यांच्याविरोधात महाराष्ट्र दारुबंदी अधिनियमन कलम ६५ (अ) प्रमाणे गुन्हा दाखल करण्यात आला आहे.