Pune Amrit Bharat Express train Update : आता पुणे उत्तर भारताला जोडलं जाणार आहे. होय, कारण पुण्याहून उत्तर भारतासाठी दररोज ट्रेन सुरू करण्यात आली आहे. हडपसर (पुणे)-बनारस (वाराणसी) या मार्गावर अमृत भारत एक्सप्रेसला मंजुरी देण्यात आली आहे. २४ एप्रिलपासून पुणे-बनारस ही अमृत भारत एक्सप्रेस धावणार आहे. त्याशिवाय पुणे-जबलपूर ही विशेष धावणारी ट्रेन आता नियमित करण्यात आली आहे. या दोन एक्सप्रेस ट्रेनमुळे (Amrit Bharat Express train between Hadapsar and Banaras (Varanasi)) पुणे आणि उत्तर भारत आणखी जवळ येणार आहे.

अमृत भारत एक्सप्रेस ट्रेन ( Hadapsar–Banaras Amrit Bharat Express) पुण्यातील हडपसर टर्मिनलहून सुटणार आहे. यामुळे पुणे रेल्वे स्थानकावरील गर्दी कमी होण्यास मदत मिळणार आहे. सोमवारी केंद्रीय रेल्वे मंत्री अश्विनी वैष्णव यांनी नव्या अमृत भारत एक्सप्रेसबाबतराज्यमंत्री मुरलीधर मोहोळ यांना हा अधिकृत पत्र पाठवत माहिती दिली. नव्या ट्रेनमुळे पुणे रेल्वे स्थानकावरील गर्दी कमी होईलट. प्रवाशांना थेट आणि जलद कनेक्टिव्हिटी मिळण्याची अपेक्षा त्यांनी व्यक्त केली. शुक्रवारपासून पुण्यातील हडपसर येथून वाराणसीसाठी अमृत भारत एक्सप्रेस धावेल.

अमृत ​​भारत एक्सप्रेसची वैशिष्ट्ये काय ?

अमृत ​​भारत एक्सप्रेस ही लांब पल्ल्याच्या प्रवासासाठी बनवलेली ट्रेन आहे. या ट्रेनमध्ये स्लीपर आणि जनरल क्लासच्या डब्यांसह एकूण २२ डबे असतील. यामध्ये दिव्यांग प्रवाशांसाठी खास तयार केलेले सामान-सह-गार्ड डबे देखील आहेत. सुरक्षा वैशिष्ट्यांमध्ये सीसीटीव्ही, आग शोध प्रणाली आणि सुधारित अपघात संरक्षण यंत्रणा यांचा समावेश आहे. वंदे भारत एक्सप्रेसमुळे आरामदायी अन् वेगात होणार आहे. त्याशिवाय याचं तिकीटही सर्वसामान्यांच्या अवाक्यात असेल.

कोणत्या स्थानकावर अमृत भारत एक्सप्रेस थांबणार ?

हडपसर-बनारस अमृत भारत एक्सप्रेसचे सविस्तर वेळापत्रक, थांबे आणि बुकिंगच्या तारखा अद्याप जाहीर झाल्या नाहीत. लवकरच रेल्वेकडून याची सविस्तर माहिती जाहीर केली जाणार आहे.

हडपसर (पुणे), दौंड , मनमाड जंक्शन, भुसावळ जंक्शन,खंडवा, इटारसी जंक्शन,जबलपूर, कटनी जंक्शन, प्रयागराज जंक्शन आणि बनारस (वाराणसी) या स्थानकावर गाडी थांबण्याची शक्यता आहे.

अमृत भारत एक्सप्रेसचे किती असणार तिकीट ?

हडपसर ते बनारस हे अंतर अंदाजे १४५० ते १५५० किमी या दरम्यान आहे. या ट्रेनचे स्लीपर क्लासचे (Sleeper Class) तिकीट ६५० त ७५० या दरम्यान असेल. तर जनरलचे तिकीट ३५० ते ४५० रूपये यादरम्यान असू शकते. अमृत भारत एक्सप्रेसचे तिकीट हे सामान्य मेल/एक्सप्रेस गाड्यांपेक्षा साधारण १५% ते १७% जास्त आहे, कारण यामध्ये वेगवान प्रवास आणि आधुनिक सुविधा (उदा. सीसीटीव्ही, चार्जिंग पॉइंट्स, चांगले टॉयलेट्स) दिल्या जातात.

पुणे-जबलपूर आता कायमस्वरूपी धावणार -

पुणे-जबलपूर विशेष गाडी (०२१३१/०२१३२) आता कायमस्वरूपी २०१९१/२०१९२ या नवीन क्रमांकाने पुणे-जबलपूर एक्सप्रेस म्हणून धावणार आहे. केंद्रीय रेल्वे बोर्डाकडून याला मान्यता देण्यात आली आहे. या बदलामुळे वर्षभर आगाऊ आरक्षण करणे सोपे होणार आहे. त्याशिवाय विशेष गाड्यांशी संबंधित असलेले जास्त भाडे कमी होऊन प्रवाशांना दिलासा मिळण्याची शक्यता आहे.