पुण्यातील हडपसर भागातील ७५ वर्षीय ज्येष्ठ नागरिकाची सायबर चोरट्यांनी तब्बल १२ कोटी रुपयांची फसवणूक केल्याचा धक्कादायक प्रकार समोर आला आहे. शेअर बाजारात चांगला परतावा मिळवून देतो असे भासवून ११ दिवसात ५४ कोटी रुपये मिळतील या अमिषाला बळी पडत ज्येष्ठ नागरिकाने तब्बल १२ कोटी रुपये गमावले.

पोलिसांनी दिलेल्या माहितीनुसार, तक्रारदार ७५ वर्षाचे असून पुण्यातील हडपसर भागात वास्तव्यास असून ते निवृत्त व्यावसायिक आहेत. फिर्यादी यांना जानेवारी महिन्यात एका अनोळखी नंबर वरून मेसेज आला. शेअर बाजारात गुंतवणूक केल्यास चांगला परतावा मिळेल असं आमिष त्यामध्ये त्यांना दाखवण्यात आलं. या अमिषाला बळी पडल्यानंतर सायबर चोरट्यांनी त्यांना एका व्हॉट्सॲप ग्रुप मध्ये सहभागी केलं.

"व्हि आय पी स्टॉक २४" असं या ग्रुपला नाव देण्यात आलं होतं. या मधून चोरट्यांनी त्यांना शेअर बाजारातील गुंतवणूक योजनांची माहिती दिली. जाळ्यात ओढल्यानंतर चोरट्यांनी त्यांना ११ दिवसात ५४ कोटी रुपये मिळवून देऊ असं आकर्षक आमिष दाखवलं गेलं. या नंतर फिर्यादी यांनी ३ महिन्यात सायबर चोरट्यांनी सांगितलेल्या वेगवेगळ्या वेळेला ८ बँक खात्यांमध्ये पैसे भरले. शेअर बाजारात गुंतवणुकीच्या बहाण्याने चोरट्यांनी त्यांच्याकडून तीन महिन्यात वेळोवेळी १२ कोटी ३१ लाख रुपये लुबाडले. या प्रकरणी पोलीस तपास करत आहेत.