अक्षय बडवे, साम टीव्ही, प्रतिनिधी

Pune Ganeshutsav : अनंत चतुदर्शीला अवघे दोनच दिवस उरले आहेत. या अनुषंगाने प्रशासनाने तयारीला सुरुवात केली आहे. पुणे आणि आसपासच्या परिसरात गणेश विसर्जनाच्या हिशोबाने जय्यत तयारी सुरु झाली आहे. यादरम्यान पुणे प्रशासनाने गणेश विसर्जनानंतर गणरायाच्या मूर्तींचे छायाचित्रण आणि प्रसारण करण्यास मनाई केली आहे.

मिळालेल्या माहितीनुसार, पुण्यामध्ये गणेश विसर्जनानंतर मूर्तीचे छायाचित्रण व प्रसारणास बंदी असल्याचे जाहीर केले आहे. विसर्जनानंतर कृत्रिम तलाव, हौद, नदीमधील तरंगत्या किंवा अर्धवट तरंगत्या त्याव्यतिरिक्त संकलित केलेल्या मुत्यांचे छायाचित्रण करण्यास मनाई असल्याचे आदेश पुणे प्रशासानाने जारी केलेले आहेत.

गणरायाच्या विसर्जनादरम्यान धार्मिक भावना दुखावतील असे कृत्य करण्याचा आणि सार्वजनिक शांतता भंग पावेल अशी छायाचित्रे अथवा चलचित्रे समाजमाध्यमांवर प्रकाशित किंवा प्रसारित करण्यास मनाई असल्याचे पुणे प्रशासनाचे आदेश आहेत. पुणे शहरात हा आदेश लागू करण्यात आल्याची माहिती समोर आली आहे.

पुणे शहरात विसर्जनानंतर गणेश मूर्तींचे छायाचित्रण, त्यांचे प्रकाशन आणि प्रसारण यावर बंदी घालण्यात आली आहे. या आदेशांचे उल्लंघन करणाऱ्यांवर दंडात्मक कारवाई केली जाणार असल्याचेही प्रशासनाने स्पष्ट केले आहे. अनंत चतुर्दशीच्या दिवशी कोणाच्याही धार्मिक भावना दुखावू नये असे प्रशासनाचे उद्दिष्ट आहे.