सचिन जाधव, पुणे प्रतिनिधी

Pune Ganpati Visarjan News : पुण्यात गणपती विसर्जनादरम्यान एक दुर्दैवी घटना घडली आहे. मुळशी परिसरात एका युवकाचा गणपती विसर्जनादरम्यान बुडला. मंगळवारी रात्री उशिरापर्यंत शोध सुरू होता, त्यानंतर आज सकाळपासून शोधकार्य सुरूच आहे. पण अद्याप तुरूणाचा शोध लागला नाही. लक्ष्मण चव्हाण असे बुडालेल्या तरूणाचे नाव आहे. तो मूळचा लातूरमधील उदगीर तालुक्यातील आहे. मुळा नदीच्या किनाऱ्यावर ही दुर्घटना घडली. मित्रांसोबत गणेश विसर्जनाला गेला होता, त्यावेळी ही दुर्घटना घडली.

मंगळवारी सायंकाळी ५ वाजण्याच्या सुमारास, पिरंगुट- हिंजवडी मार्गावरील भरे पूल येथे मुळा नदीच्या किनारी ही दुर्घटना घडली. लक्ष्मण हा एका खाजगी हॉस्पिटलमध्ये कर्मचारी म्हणून काम करतोय. विसर्जनासाठी मित्रांसोबत खोल पाण्यामध्ये गेला होता. त्या ठिकाणी पाण्यामध्ये त्यांनी डुबकी मारली, पण लक्ष्मण तसाच नदीच्या पात्रामध्ये वाहत खाली गेला. लक्ष्मण मूळचा उदगीर तालुक्यातील असून सध्या तो पिरंगुट येथे राहत होता. त्याचा शोध आपत्ती व्यवस्थापन समितीने घेत असताना संध्याकाळ झाल्याने शोध थांबवण्यात आला. आज सकाळपासून या बुडलेल्या मुलाचा शोध घेतला जात आहे.

अग्निशमन दल आपत्ती व्यवस्थापन ग्रामीण पोलीस तपास करत आहेत. काल पाण्याचा प्रवाह जोरात असल्याने तसेच रात्र झाल्याने शोध मोहीम थांबवण्यात आली आहे. बेपत्ता तरुणाचा आज सकाळी पुन्हा शोध घेतला जात आहे. पुण्यामध्ये मंगळवारी सात दिवसांच्या गणपीतीचे विसर्जन झाले. पुणेकरांनी लाडक्या बाप्पााला जड अंत:करणाने निरोप दिला. गणरायाला निरोप देण्यासाठी गेलेल्या लक्ष्मण चव्हाण हा तरूण पाण्यात वाहून गेलाय. त्याचा शोध अद्याप सुरू आहे. गणेश विसर्जनावेळी काळजी घेण्याचे आवाहन पोलीस आणि प्रशासनाकडून करण्यात येत आहे.