सचिन जाधव, साम टीव्ही

लग्नाच्या वरातीत नाचण्यावरून झालेल्या वादातून एका तरुणाची निर्घृण हत्या करण्यात आल्याची धक्कादायक घटना पुण्यात घडली आहे. तेजस दत्तात्रय पिलाने असे हत्या झालेल्या तरुणाचे नाव आहे. या प्रकरणी भारती विद्यापीठ पोलिसांनी वेगाने सूत्रे फिरवत चार आरोपींना बेड्या ठोकल्या आहेत.

मिळालेल्या माहितीनुसार, तेजस पिलाने आणि आरोपी विशाल खोपडे यांच्यात काही दिवसांपूर्वी एका लग्नाच्या वरातीत नाचण्यावरून जोरदार भांडण झाले होते. त्यावेळचा राग मनात धरून विशाल आणि त्याच्या साथीदारांनी तेजसचा काटा काढण्याचे ठरवले. या वादाचा सूड घेण्यासाठी आरोपीनी तेजसला गाठले आणि त्याच्यावर धारदार शस्त्राने सपासप वार केले. या हल्ल्यात गंभीर जखमी झालेल्या तेजसचा जागीच मृत्यू झाला.

हत्येची माहिती मिळताच भारती विद्यापीठ पोलिसांनी घटनास्थळी धाव घेतली. तपासाची चक्रे फिरवत पोलिसांनी या प्रकरणातील मुख्य आरोपी विशाल खोपडे याच्यासह अभिषेक खोपडे, सचिन धुळे आणि आदिनाथ कसबे या चौघांना अटक केली आहे.