पुणे : पुण्यात एक धक्कादायक प्रकार समोर आला आहे. पुण्यातल्या खडकीजवळच्या एसटी बस चालकाला आणि वाहकाला बेदम मारहाण केली असल्याचं समोर आलंय. तसंच बसवर आणि त्यांच्यावर दगडफेक देखील केल्याचं पुढे आलं आहे. मारहाणीचं कारण अद्याप अस्पष्ट असून, बसमध्ये ४३ प्रवासी असताना ही गाडी थांबवली आणि बसच्या खाली उतरुन ही हाणामारी झाल्याचं पाहायला मिळालं आहे. अहमदपूर ते मुंबई या गाडीतील चाकल आणि वाहकाला मारहाण करण्यात आलं असल्याचं समोर आलं आहे. दरम्यान, या मारहाणीचा व्हिडिओ सध्या प्रचंड प्रमाणात व्हायरल होत आहे.

पुण्यातील 'या' कॉलेजमध्ये शिक्षकाचा रात्रीस खेळ चाले

दरम्यान, इंजिनिअरिंगच्या पहिल्या वर्षीचा गणिताचा पेपर हा सर्व विद्यार्थ्यांचा अवघड विषय. हा गणिताचा पेपर पास करून देण्यासाठी पुण्यातील वाघोली भागात असलेल्या पार्वतीबाई गेनबा मोझे या महाविद्यालयातील एका प्रोफेसरने विद्यार्थ्यांकडून लाखो रुपये उकळल्याचा धक्कादायक प्रकार समोर आलाय. पुणे पोलिसांच्या गुन्हे शाखेने कारवाई करत या प्रोफेसरसह चौघांना बेड्या ठोकल्या आहेत. प्राध्यापक प्रतिक किसन सातव यासह आदित्य खिलारे, अमोल नागरगोजे आणि अनिकेत रोडे अशी अटक केलेल्या आरोपींची नावे आहेत.

मिळालेल्या माहितीनुसार, प्राध्यापक सातव हा कॉलेजमध्ये दुपारी झालेला पहिल्या वर्षांचा इंजिनियरींगचा गणिताचा पेपर रात्री कॉलेजमध्ये इंजिनीयरींगचे शिक्षण घेत असलेल्या विदयार्थ्यांना पुन्हा लिहिण्यासाठी देत होता.

आरोपीकडून सावित्रीबाई फुले पुणे विद्यापीठाचे गणित २ या विषयाचे लिहिलेले उत्तरपत्रिकेचे ६ बंडल तसेच रोख रक्कम २ लाख ६ हजार रुपये आणि उत्तरपत्रिका ठेवण्यात आलेल्या कंट्रोल रूमची चावी असा मुद्देमाल जप्त करण्यात आला आहे. गणित २ या विषयामध्ये नापास होण्याची भिती वाटते अशा विद्यार्थ्यांना हेरून त्यांच्याकडून स्वतःचे आर्थिक फायद्यासाठी संगनमत करुन १० ते ५० हजार रुपये घ्यायचा.