Pune Crime : पुण्यातल्या स्वारगेट बस डेपोमध्ये एका २६ वर्षीय तरुणीवर बलात्कार झाल्याची घटना काल उघडकीस आली. आरोपीने तरुणी एकटी असल्याचा फायदा घेत तिच्यावर बलात्कार केला. ही तरुणी पुण्याहून फलटणला तिच्या घरी जात होती. हा प्रकार समोर आल्यानंतर पोलिसांनी आरोपी दत्तात्रय गाडेचा शोध घ्यायला सुरुवात केली आहे.

दत्तात्रय गाडेचा शोध घेण्यासाठी पुणे ग्रामीण पोलीस दलातील १०० पोलिसांचे पथक गुणाट गावात दाखल झाले आहे. हे १०० पोलिसांचे पथक थेट ऊसाच्या शेतात घुसून तपास करणार आहे. पुणे ग्रामीण पोलिसांचे पथक पोहोचल्यापूर्वी ड्रोन आणि श्वान पथकाकडून तपास सुरु आहे.

पुणे पोलील दत्तात्रय गाडेचा शोध घेत आहेत. शिरूरमध्ये पोलिसांकडून ड्रोन इमेजिंग केले आहे. प्रत्यक्षदर्शींनी दिलेल्या माहितीनुसार, दत्ता हा शिरूरच्या ऊसाच्या शेतामध्ये लपला होता. पुणे पोलीस दलाच्या पथकांकडून दत्तात्रय गाडेचा शोध सुरु आहे. त्याला शोधण्यासाठी पुणे पोलिसांच्या गुन्हे शाखेने १३ पथकं तयार केली आहेत.

आरोपी दत्तात्रय गाडे हा शिरूर तालुक्यातील गुणाट गावातला असल्याची माहिती समोर आली आहे. तो राजकीय नेत्याचा कार्यकर्ता असल्याचेही समोर आले आहे. महाराष्ट्र राज्याच्या विधानसभा निवडणुकीत दत्ता गाडे हा प्रचारात सहभागी देखील झाला होता. पोलिसांच्या चौकशीनुसार, तो राजकीय व्यक्ती, पोलीस यांच्या संपर्कात असल्याचे म्हटले जात आहे.