महसूल विभागात सचिव असल्याची बतावणी करत सहाय्यक क्लार्कच्या साथीने सरकारी नोकरीचे आमिष दाखवत दोघांनी ३० जणांना आर्थिक गंडा घातला. महसूल, वनविभाग, पोलिस खात्यात क्लास वन, क्लास टूची नोकरी मिळवून देतो असे सांगून एक लाखांपासून २० लाख रुपयापर्यंत या जोडीने पैसे उकळे आहेत.

तरुणांना विश्वास वाटावा म्हणून दोघांनी चक्क बनावट नियुक्ती पत्रे देखील तयार केली होती. गुन्हे शाखा युनिट- २ च्या पथकाने तोतया सचिव आणि पुणे तसहसीलदार कार्यालयात नियुक्तीस असलेल्या महसूल सहाय्यक क्लार्कला बेड्या ठोकल्या आहेत. महादेव बाबूराव दराडे (३२ वर्षे, राहणार - व्हाईट फिल्ड सोसायटी काळा खडक वाकड), रणजीत लक्ष्मण चौरे (३५ वर्षे,राहणार - धायरी) अशी अटक करण्यात आलेल्या दोघांची नावे आहेत.

श्रीगोंदा तालुक्यातील सूरज कैलास पाचपुते (२२ वर्षे) या तरुणाला पोलिस उपनिरीक्षक पदी नोकरी लावतो म्हणून आरोपी दराडेने १० लाख रुपये घेतले. फसवणूक झाल्याचे पाचपुते याच्या लक्षात आल्यानंतर त्याने याबाबत बंडगार्डन पोलिस ठाण्यात तक्रार दिली होती. त्यानुसार पोलिसांनी महादेव दराडेच्या विरोधात गुन्हा दाखल करत त्याला अटक केली.