सचिन जाधव, पुणे

Pune Rupesh Shinde Murder News पुण्यातून क्षुल्लक कारणावरून कोयत्याने हल्ला, प्रेम संबंधातून तरुणाची हत्या अशा घटना सतत समोर येत असताना आता चोरीच्या संशयातून एका तरुणाची हत्या केल्याची धक्कादायक प्रकरण उघडकीस आले आहे. कबुतर चोरीच्या आरोपाखाली तरुणाला मारहाण करण्यात आली. या मारहाणीत त्याचा मृत्यू झाला. या प्रकरणी पाच जणांविरुध्द खुनाचा गुन्हा दाखल करण्यात असून पोलीस पुढील तपास करत आहेत.

मिळालेल्या माहितीनुसार,रूपेश धनराज शिंदे (वय १९) असे मृत मुलाचे नाव आहे. हत्येच्या दिवशी त्याच्यासोबत त्याचा मित्र अजय गणेश टिंगरे (वय २०) हा होता. १८ मार्च रोजी पहाटे अडीच ते तीनच्या सुमारास रूपेश आणि अजय हे दुचाकीवरून मोशीकडे जात होते. हडपसर येथील शंकरमठाजवळ ते रस्त्याच्या कडेला थांबले होते. त्यानंतर पवार एन्क्लेव्ह सोसायटीसमोर कॅनाललगत असलेल्या मोकळ्या जागेत कबुतरांच्या पिंजऱ्याजवळ गेले.

त्यावेळी श्वानांचा आवाज आल्याने ते दोघे तेथून पळू लागले. यावेळी स्थानिक पाच जणांनी चोरीच्या संशयावरून त्यांचा पाठलाग केला. मुख्य रस्त्यावरील जिनमाता मोटर्ससमोर रूपेश शिंदे पळताना खाली पडला. त्यानंतर टोळक्याने त्याला लाथाबुक्क्यांनी आणि बॅटने बेदम मारहाण केली. या मारहाणीत गंभीर जखमी झाल्याने त्याचा मृत्यू झाला. याप्रकरणी रुपेश याचे वडील धनराज बळिराम शिंदे यांनी पोलीस ठाण्यात तक्रार दाखल केली आहे. वानवडी पोलिस पुढील तपास करत आहेत.