पुणे : कसबा विधानसभा पोटनिवडणूक बिनविरोध होणार नाही हे आता हळूहळू स्पष्ट होताना दिसत आहे. त्यामुळे भाजपने देखील ही निवडणूक ताकदीने लढण्यासाठी हालचाल सुरु केली आहे. या निवडणुकीत टिळक कुटुंबियांना उमेदवारी मिळणार नसल्याची दाट शक्यता आहे.

भाजपकडून या निवडणुकीत ताकदीचा उमेदवार दिला जाण्याची चर्चा आहे. भाजपमध्ये टिळक कुटुंबीय वगळता इतर उमेदवारांच्या नावाची चर्चा सुरू झाली आहे. हेमंत रासने आणि गणेश बिडकर यांच्यापैकी एकाला उमेदवारी मिळण्याची शक्यता आहे.

पुण्यात भाजपच्या बैठका सुरु आहे. चार नावं प्रदेश भाजपकडे पाठवण्यात आली होती. त्यापैकी एका नावावर शिक्कामोर्तब होईल अशी शक्यता होती. मात्र पोटनिवडणूक असल्याने टिळक कुटुबियांना संधी मिळेल अशी शक्यता वर्तवली जात होती. मात्र निवडणुकीत सर्व पक्ष उतरल्याने भाजप देखील सावध भूमिका घेण्याची शक्यता वर्तवली जात आहे.

आजपासून उमेदवारी अर्ज दाखल करण्यास सुरुवात

कसबा पेठ विधानसभा मतदारसंघाच्या पोटनिवडणुकीसाठी उमेदवारी अर्ज भरण्याची मुदत मंगळवारपासून सुरू होत असून, ७ फेब्रुवारीपर्यंत उमेदवारी अर्ज भरता येणार आहे. भाजपच्या चार इच्छुकांची नावे शहर भाजपने प्रदेश स्तरावर पाठवली आहेत. त्यामुळे भाजपकडून कुणाला उमेदवारी मिळणार याकडे सर्वांचं लक्ष आहे.