पुण्यातून मोठी बातमी समोर आली आहे. शहरात शुक्रवारी PMPML बसच्या धडकेत दोन महिलांचा वेगवेगळ्या अपघातांत मृत्यू झाला. सकाळी चांदणीनगर येथे पुणे-नगर महामार्गावर स्कूटरला PMPML बसने धडक दिल्याने सुनीता काटे (वय ५४, रा. आकुर्डी) यांचा मृत्यू झाला. या अपघातात त्यांचा मुलगा जखमी झाला असून, बसचालक घटनास्थळावरून बस घेऊन पसार झाला.

पोलिसांनी दिलेल्या माहितीनुसार, सुनीता काटे या शुक्रवारी सकाळी मुलासोबत स्कूटरवरून पुण्याहून वाघोलीच्या दिशेने जात होत्या. चांदणीनगर परिसरात त्यांच्या स्कूटरला PMPML बसने धडक दिली. या अपघातात काटे गंभीर जखमी झाल्या. उपचारासाठी रुग्णालयात दाखल करण्यापूर्वीच त्यांचा मृत्यू झाला, तर मुलावर उपचार सुरू आहेत. या प्रकरणी काटे यांचे भाऊ सुनील नागवडे यांनी विमानतळ पोलिस ठाण्यात तक्रार दाखल केली आहे. हा हिट अँड रनचा प्रकार असल्याने पोलिस घटनास्थळावरील सीसीटीव्ही फुटेज तपासत आहेत. बसचा क्रमांक आणि चालकाची ओळख पटवण्याचे काम सुरू आहे.

दरम्यान, शुक्रवारी दुपारी पुणे-मुंबई मार्गावर आणखी एका अपघातात निर्मला नरेश पिल्लई (वय ५७, रा. बोपोडी) यांचा PMPML बसच्या धडकेत मृत्यू झाला. पिल्लई या बोपोडीहून खडकीच्या दिशेने पायी जात असताना बसने त्यांना धडक दिली.

या प्रकरणी खडकी पोलिसांनी २२ वर्षीय PMPML बसचालकाला अटक केली होती. त्यानंतर त्याला नोटीस बजावून सोडण्यात आले. पिल्लई यांच्या मुलगी प्रीती मूर्ती (३२, रा. बोपोडी) यांनी पोलिसांत तक्रार दाखल केली आहे. शहरात एकाच दिवशी PMPML बसच्या धडकेत दोन महिलांचा मृत्यू झाल्याने प्रवाशांच्या सुरक्षिततेचा मुद्दा पुन्हा ऐरणीवर आला आहे.