Pune : पुण्यातून एक खळबळजनक घटना उघडकीस आली आहे. पुण्यातील बालेवाडी फाट्याजवळ एटीएसमधून पैसे काढल्यानंतक एका ६३ वर्षीय निवृत्त व्यावसायिकाला ऑटोरिक्षाने जोरात धडक मारली. ऑटोरिक्षा चालकाने मदत करण्याचे नाटक करत वृद्ध व्यक्तीला एका निर्जन परिसरात सोडून दिले. जखमी असताना उपचार न झाल्याने वृद्ध व्यक्तीचा मृत्यू झाला. या प्रकरणी ऑटोरिक्षाचालकाच्या विरोधात गुन्हा दाखल करण्यात आला आहे.

मिळालेल्या माहितीनुसार, ज्युपिटर हॉस्पिटलपासून अवघ्या ५०० मीटर अंतरावर अपघात झाला. ६३ वर्षीय गोपाळ वाघ यांना रिक्षाने धडक मारली. आसपासच्या लोकांना घाबरुन रिक्षाचालकाने गोपाळ यांना रिक्षात बसून रुग्णालयात नेण्याचे नाटक केले. पण त्याने गोपाळ यांना रेंज हिल्सजवळच्या एका निर्जन परिसरात सोडून दिले. वाघ यांच्या कुटुंबीयांनी बेपत्ता झाल्याची तक्रार दाखल केल्यानंतर तब्बल २४ तासांनंतर गोपाळ वाघ यांना मृतदेह सापडला.

दोन तासांहून अधिक काळ ते (गोपाळ वाघ) घरी परतले नाही, तेव्हा आम्हाला काळजी वाटली. एटीएमजवळ त्याची दुचाकी पार्क असल्याचे पाहिले. मला रस्त्यावर त्यांची चप्पल दिसली. इथे अपघात झाल्याचे मला स्थानिकांनी सांगितले, असे गोपाळ वाघ यांचा मुलगा अमित वाघ यांनी सांगितले. त्यानंतर वाघ कुटुंबाने बाणेर पोलीस ठाण्यात बेपत्ता व्यक्तीची तक्रार दाखल केली. पोलिसांनी परिसरातील सीसीटीव्ही फुटेज तपासले.

वरिष्ठ पोलीस निरीक्षक चंद्रशेखर सावंत यांनी दिलेल्या माहितीनुसार, ऑटोरिक्षा बालेवाडीहून विद्यापीठ चौकाकडे जात असताना वाघ रस्ता ओलांडताना हा अपघात घटला. घटनास्थळी गर्दी जमली आणि लोकांनी चालकाला जखमी व्यक्तीला रुग्णालयात नेण्यात सांगितले. चालकाने होकार दिला पण जखमीला त्याने रेंज हिल्सकडे एका निर्जन ठिकाणी सोडले. त्यासाठी जखमीचा उपचाराअभावी मृत्यू झाला. आरोपी रिक्षाचालकाचा शोध सुरु असल्याचे सावंत यांनी सांगितले आहे. जखमी व्यक्तीला सोडून देण्याच्या रिक्षाचालकाच्या निर्णयामुळे परिसरात संताप व्यक्त केला जात आहे.