अंबरनाथ : अंबरनाथ नगरपालिकेच्या कर्मचाऱ्यांनी आज कामबंद आंदोलन केले. ठाण्यात फेरीवाल्यांवरील कारवाई दरम्यान महिला अधिकाऱ्यावर झालेल्या हल्ल्याचा निषेध म्हणून हे आंदोलन करण्यात आले.

हे देखील पहा -

ठाणे महापालिकेच्या सहाय्यक आयुक्त कल्पिता पिंपळे या फेरीवाल्यांवर कारवाई करत असताना एका परप्रांतीय फेरीवाल्याने त्यांच्यावर कोयत्याने हल्ला केला होता. या घटनेत पिंपळे यांच्या हाताची दोन बोटे तुटली होती. तर, त्यांच्या सुरक्षारक्षकाचेही एक बोट तुटले होते. या घटनेनंतर राज्यभरातून तीव्र पडसाद उमटले. यानंतर आता अंबरनाथ पालिकेच्या कर्मचाऱ्यांनाही आज एक दिवस कामबंद आंदोलन करत या घटनेचा निषेध केला.

या आंदोलनात पालिकेतील सर्व अधिकारी आणि कर्मचारी सहभागी झाले होते. फक्त अत्यावश्यक सेवा या आंदोलनातून वगळून सुरू ठेवण्यात आल्या होत्या. त्यामुळे नागरिकांना या आंदोलनाचा फारसा त्रास झाला नाही. मात्र संपूर्ण प्रशासकीय कामकाज यावेळी बंद ठेवण्यात आले होते.

Edited By : Krushnarav Sathe