मुंबई - राज्याभरात सध्या अंधेरी पूर्व विधानसभा पोटनिवडणूकीवरुन चांगलीच चर्चा सुरु आहे. त्यातच आता शिवसेना (Shivsena) उद्धव बाळासाहेब ठाकरे (Uddhav Thackeray) पक्षावर अंधेरी पोटनिवडणूकी संदर्भात गंभीर आरोप करण्यात आले आहे. अपक्ष उमेदवारांवर माघार घेण्यासाठी दबाव आणला जात होता तसेच अजूनही दबाव आणला जात आहे असा गंभीर आरोप अपक्ष उमेदवार मिलिंद कांबळे यांनी ठाकरे गटावर केला आहे.

याप्रकरणी अपक्ष उमेदवार मिलिंद कांबळे यांनी निवडणुक आयोगाकडे एक पत्र लिहून तक्रार दाखल केली आहे. ऋतुजा लटके यांच्यासोबत असलेले सहकारी मला धमकी देत होते असे देखी मिलिंद कांबळे यांनी आपल्या तक्रारीत म्हंटले आहे. यावर आता ठाकरे गट काय प्रतिक्रिया देणार याकडे साऱ्यांचे लक्ष लागलेले आहे.

अंधेरी पोटनिवडणुकीतून भाजपची माघार

अंधेरी विधानसभा पोटनिवडणुकीत भाजप आणि शिंदे गटाने माघार घेतली आहे. उमेदवार मुरजी पटेल यांचा अर्ज परत घेण्याची घोषणा करण्यात आली आहे. आम्ही अर्ज परत घेत आहोत, अशी घोषणा भाजप प्रदेशाध्यक्ष चंद्रशेखर बावनकुळे यांनी केली. मुरजी पटले हे अपक्ष म्हणून देखील निवडणूक लढणार नाहीत. त्यामुळे ऋतुजा लटके यांच्या विजयाचा मार्ग मोकळा झाला आहे.

शिवसेनेच्या चिन्ह आणि नावाचा मुद्दा

निवडणूक आयोगाने (Election Commission) अंधेरी पोटनिवडणुकीची घोषणा केल्यानंतर या रणसंग्रामात उमेदवार कोण असेल यापेक्षा निवडणुकीत फूट पडलेल्या शिवसेनेच्या चिन्ह आणि नावाचा मुद्दा पुढे आला. निवडणुकीआधी हा पेच सोडवणे महत्त्वाचे होते. सुप्रीम कोर्टाने याबाबतचा निर्णय निवडणूक आयोगावर सोपवला. त्यामुळे आपल्या पसंतीचं नाव आणि चिन्ह मिळवण्यासाठी शिंदे आणि ठाकरे गटाकडून चढाओढ सुरु झाली. अखेर निवडणूक आयोगाने ठाकरे गटाला 'शिवसेना उद्धव बाळासाहेब ठाकरे' हे नाव आणि मशाल हे चिन्ह दिलं. तर शिंदे गटाला 'बाळासाहेबांची शिवसेना' हे नाव आणि ढाल-तलवार हे चिन्ह देण्याचा निर्णय घेतला.

Edited By - Shivani Tichkule