मुंबई: आमदार प्रसाद लाड यांच्याविरोधात आपने विधान परिषद सभापती, गृहमंत्री दिलीप वळसे पाटील आणि पोलीस आयुक्तांना पत्र पाठवले आहे. प्रसाद लाड यांनी मुंबै बँके प्रकरणी फसवणूक केल्याचा आरोप आपने केलाय. याप्रकरणी त्यांची चौकशी करण्यात यावी अशी मागणी आपने केलीये. यावर लाड यांनी प्रतिक्रिया देत ज्यांनी तक्रार केलीये त्यांनी अभ्यास करावा, असं म्हटलं आहे (Prasad Lad Reaction On AAPs Letter To Home Minister About Mumbai Bank Scam).

ज्यांनी तक्रार केली आहे त्यांनी अभ्यास करावा - प्रसाद लाड

"पगारदार वर्गातून आम्ही निवडून येतो. मी व्यावसायिक असलो तरीही कंपनीत मी पगारदारच असतो. ज्यांनी तक्रार केली आहे त्यांनी अभ्यास करावा. मला नोटीस आलेली नाही. नोटीस आली तर मी उत्तर देईल. मी पळून जाणारा नाही,जश्यास तसे उत्तर दिले जाईल", असं प्रसाद लाड (Prasad lad) म्हणाले.

आपची मागणी काय?

प्रसाद लाड हे मुंबै बँकेचे (Mumbai Bank) संचालक आहेत. मुंबै बँकेच्या 2021-2026 या पंचवार्षिक निवडणुकीसाठीची मतदार यादीनुसार प्रसाद लाड हे 'क्रिस्टल कर्मचारी सहकारी संस्था मर्यादित' या संस्थेतर्फे मतदार आहेत असे नमूद आहे.

प्रसाद लाड हे विधान परिषदेचे आमदार आहेत. व्यवसायाने ते उद्योजक आहेत. पगारदार नोकर नाहीत. गेले कित्येक वर्षे ते मुंबै बँकेत पगारदार नोकरांच्या सहकारी संस्थेतर्फे निवडून जात आहेत. हे अत्यंत गंभीर आणि जनतेची दिशाभूल करणारे आहे, असा आरोप आपकडून करण्यात आला आहे .

Edited By - Nupur Uppal