मुंबई: वरिष्ठ पोलीस अधिकारी रश्मी शुक्ला (IPS Rashmi Shukla) यांच्या विरोधातील तपास बंद करण्यात आल्यानंतर त्या पोलीस महासंचालकपदी पात्र ठराव्यात म्हणून केंद्र सरकारने (Central Govt) प्रयत्न सुरू केले असल्याची माहिती सूत्रांनी दिली आहे.

रश्मी शुक्ला या सध्या केंद्रात प्रतिनियुक्तीवर आहेत. महाविकास आघाडी सरकारच्या काळात शुक्ला यांच्या विरोधात फोन टॅपिंग प्रकरणामध्ये (Phone tapping) सहभाग असल्याबाबतचा गुन्हा दाखल करण्यात आला होता. परिणामी त्या महासंचालकपदासाठी पात्र ठरल्या नव्हत्या.

मात्र, राज्यात सत्तांतर झाल्यानंतर राज्य सरकारने शुक्ला यांना क्लिन चिट दिल्यानंतर आता त्यांची वर्णी महासंचालकपदी लागावी यासाठी प्रयत्न सुरु झाल्याची माहिती समोर येत आहे. जर शुक्ला या केंद्रात पोलीस महासंचालकपदाकरिता पात्र ठरल्या तर त्यांना राज्याच्या सेवेत पोलीस महासंचालकपदी येण्याचा मार्ग मोकळा होऊ शकतो. (Director General of Police)

सध्या केंद्रात प्रतिनियुक्तीवर असलेल्या शुल्का यांची मुंबईच्या पोलीस आयुक्त अथवा लाचलुचपत प्रतिबंधक विभागाच्या महासंचालकपदी नियुक्ती करण्यात येणार असल्याची चर्चा देखील सुरु आहे. त्यामुळे शुक्ला या पुन्हा महाराष्ट्रात येणार असल्याच्या चर्चांना उधाण आलं आहे.