पाहिलंत, ठाण्यातील ईस्टर्न एक्सप्रेस हायवेवर जिथे रोज हजारो गाड्या धावतात त्याच हायवेवर तीन हात नाका परिसरातील फुट ओव्हर ब्रिजवर लावलेलं होर्डिंग अचानक खाली पडलं आणि एका दुचाकीस्वाराच्या डोक्यावर आपटलं. मात्र काळ आला होता पण वेळ आली नव्हती म्हणून हे बाईकस्वार वाचले. ही घटना अंगावर शहारे आणणारी आहे. पण या दुचाकीस्वारावर असा प्रसंग आला तो. शिवप्रताप सेनेचे अध्यक्ष सुनील चौधरी यांच्या वाढदिवसाच्या होर्डिंगमुळे.

उपमुख्यमंत्री एकनाथ शिंदें आणि श्रीकांत शिंदेंचे फोटो लावून हा बॅनर या सुनील चौधरीच्या कार्यकर्त्यांनी लावला होता. केवळ आणि केवळ शिंदेंसमोर चमकोगिरी करण्यासाठी त्यांच्या सेनेचं लक्ष वेधून घेण्यासाठी लावलेलं हे होर्डिंग ठाणेकरांच्याच जिवावर बेतलं असतं.

२ वर्षांपुर्वी वादळी वाऱ्यात मुंबईतल्या घाटकोपर हायवेवर होर्डींग कोसळलं आणि १८ लोकं मारली गेली होती तर 80 लोकं गंभीर जखमी होती. इतकी मोठी घटना घडूनही निष्पाप लोकांच्या जीवाचं या स्वयंघोषित नेत्यांना कसं काही वाटत नाही? हे बॅनर पडल्यानंतर या चमको नेत्यानं सोशल मिडीयावर दिलगिरीचा व्हिडीओ टाकला.

ऐकलंत हा काय म्हणतोय. यापुढे बॅनर लावताना सुरक्षेची आणि योग्य ती काळजी घेतली जाईल. अरे पण ठाण्याला विद्रुप करायचा ठेका या फुटकळ नेत्यांना कोणी दिला. त्यामुळे ठाणेकरांनी या बॅनबाजीविरोधात संतप्त प्रतिक्रिया दिल्या आहेत. आता ही दुर्घटना झाल्यानंतर जागे झालेल्या महापालिकेनं कारवाईचा सूर आवळलाय. अनधिकृत बॅनरबाजी विरोधात महाराष्ट्र शहर विद्रुपीकरण प्रतिबंधक कायदा आहे. तसंच होर्डिंगबाबत उच्च न्यायालयानं कठोर निर्देश दिलेत.

जनतेला अडथळा मुक्त रस्ते मिळायला पाहिजे

बॅनरवर क्यूआर कोड बंधनकारक

उड्डाणपूल, मुख्य चौकांमध्ये बॅनरवर पूर्ण बंदी

नोडल कमिटीचं बॅनरबाजांवर लक्ष

रात्री बॅनर लावण्यासाठी पोलिस गस्तीची सूचना

दोषींवर 3 महिन्यांपर्यंतचा कारावास किंवा दंडाची तरतूद करण्यात आलीय.

मात्र कोर्टाच्या या आदेशनाला कार्यकर्ते मंडळी थेट केराची टोपली दाखवता. आणि नेतेही आपल्या कार्यकर्त्यांच्या या जीवघेण्या कृत्यांकडे कानाडोळा करतात. आणि ठाण्यातही नेमकं हेच घडलंय. त्यामुळे काही गंभीर सवाल उपस्थित झाले आहेत.

चमको नेत्याचं बॅनर अनधिकृत होतं तर ते इतके दिवस कसं राहिलं?

महापालिका आणि नोडल कमिटीचं या बॅनरवर लक्ष नव्हतं का?

लोकांचा जीव धोक्यात घालणाऱ्या या चमको नेत्यावर कारवाई होणार का?

ठाणेच काय सर्वच शहरांमध्ये स्वयंघोषित कार्यसम्राट, लोकनेते, जननायक, किंगमेकर, आणि जनतेच्या कैवाऱ्यांची कमी नाही. ठाण्यात शिंदे मुख्यमंत्री झाल्यानंतर तर प्रत्येक गल्लीत किमान डझनभर तरी नेते तयार झाले आहेत. मग वाढदिवस, जयंत्या पुण्यतिथ्या आणि त्याचे धडाधड बॅनर.. शहरं विद्रुप होतायेत, लोकांचे जीव जातायेत. पण याचं कोणालाच सोयरंसुतक नाही.