मुबंईतील आझाद मैदानावर ५ डिसेंबर रोजी दिमाखात मुख्यमंत्री देवेंद्र फडणवीस यांचा शपथविधी सोहळा पार पडला. मात्र, चोरांच्या सुळसुळाटामुळे सोहळ्याला गालबोट लागले. चार महिला आणि ११ जणांच्या सोन्याच्या चैन चोरट्यांनी लंपास केल्या. पोलिसांच्या हातावर तुरी देत १२ लाखांच्या ऐवजावर चोरट्यांनी हातसफाई केली. शपथविधी सोहळ्याला तब्बल अडीच हजारहून अधिक पोलिस तैनात होते. मात्र इथे पोलीस हवालदाराचीही बॅग लंपास करण्यात आल्याचं समोर आलं आहे.

केंद्र आणि राज्यातील नेत्यांच्या उपस्थित देवेंद्र फडवीस यांनी गुरूवारी मुख्यमंत्रिपदाची शपथ घेतली. यावेळी सिने कलाकारांचीची मांदियाळी पाहायला मिळाली. हजारो लोकांच्या उपस्थित हा भव्यदिव्य सोहळा पार पडला. मात्र चोरट्यांनी गर्दीचा फायदा घेत आपले हात साफ केले. कार्यक्रमाची सांगता होताच, गेट क्रमांक २ मधून बाहेर पडत असतानाच चोरट्यांनी डल्ला मारला.

यात चार महिला आणि ११ जणांच्या सोन्याच्या चैन चोरट्यांनी लंपास केल्या. तसेच अनेकांच्या मोबाईल फोनवर डल्ला मारला. तर काही चोरटे कार्यकर्त्यांचे हजारो रूपयांची रोकड घेऊन पसार झाले. पोलिसांच्या हातावर तुरी देत तब्बल १२ लाखांचा ऐवजावर चोरट्यांनी हातसफाई केली. शपथविधी सोहळ्याला तब्बल ४ हजारहून अधिक पोलिस तैनात होते. पण इथे पोलिसांचीही बॅग चोरट्यांनी सोडली नाही. पोलिस हवालदाराची बॅग ज्यात महत्वाची कागदपत्रे असल्याची माहिती समोर आली आहे.

द फ्री प्रेस जर्नलच्या माहितीनुसार, समारंभात एका पोलीस हवालदाराची बॅग, त्यात त्याचे एटीएम कार्ड, रोख रक्कम, कपडे आणि इतर वस्तू चोरीला गेल्याची माहिती आहे. महापालिकेच्या गेटवरील सीसीटीव्हीमध्ये कैद झालेल्या व्हीडीओमधून ही बाब समोर आली आहे. मात्र पोलिस हवालदाराची बॅग चोरीला नसून हरवली असलेल्याची तक्रार नोंदवण्यात आली आहे. पोलिसांना पोलिस ठाण्यात सहकार्य होत नसल्याने पोलिसांकडून याबाबत पोलिसांच्या व्हाॅट्स अॅप ग्रुपवर नाराजी व्यक्त केली जात आहे.