संत तुकारामनगर परिसरातील आंत्रिक सोसायटीजवळ एमडी (मेफेड्रॉन) हा अमली पदार्थ विक्री करण्यासाठी काही संशयित तस्कर येणार असल्याची गुप्त माहिती हवालदार जावेद बागसिराज यांना मिळाली होती. त्यानुसार गुन्हे शाखेच्या अमली पदार्थ विरोधी पथकाने त्या परिसरात सापळा रचला. पोलिसांची चाहूल लागताच अमली पदार्थ विक्रीसाठी आलेल्या एका संशयिताला पथकाने जागेवरच पकडले. मात्र त्याचा दुसरा साथीदार पोलिसांना चकवा देऊन अंधाराचा फायदा घेत पळून जाऊ लागला.

अचानक कोसळले जमिनीवर

पळून जाणाऱ्या संशयिताचा जावेद बागसिराज यांनी धाडसाने पाठलाग सुरू केला. मात्र, वेगाने धावत असताना अचानक त्यांच्या छातीत तीव्र कळा आल्या आणि ते रस्त्यातच धाडकन जमिनीवर कोसळले. सहकाऱ्यांनी क्षणाचाही विलंब न लावता त्यांना तातडीने पिंपरीतील यशवंतराव चव्हाण स्मृतीरुग्णालयात दाखल केले. मात्र, उपचारादरम्यान त्यांना दुसरा तीव्र हृदयविकाराचा झटका आला.

जावेद बागसिराज मूळचे कर्नाटकातील असले, तरी त्यांचे कुटुंब पुण्यात स्थलांतरित झाल्यानंतर त्यांचा जन्म पुण्यातच झाला होता. २०१० मध्ये ते पुणे शहर पोलीस दलात भरती झाले होते.

सुरुवातीला हडपसर आणि मुंढवा पोलीस ठाण्यात सेवा बजावल्यानंतर, २०१८ मध्ये स्वतंत्र पिंपरी-चिंचवड आयुक्तालय स्थापन झाल्यावर ते येथे रुजू झाले. पिंपरी पोलीस ठाण्यानंतर गुन्हे शाखेच्या अमली पदार्थ विरोधी पथकात ते अत्यंत तत्परतेने आणि प्रामाणिकपणे कार्यरत होते. सोमवारी दुपारी पुण्यातील कसबा पेठ येथील कब्रस्तानात शासकीय इतमामात त्यांच्यावर अंत्यसंस्कार करण्यात आले.