पुणे, ता. २१ ऑगस्ट २०२४

पिंपरी चिंचवड शहरातून एक मोठी बातमी समोर आली आहे. पिंपरीमधील बौद्धनगर परिसरात घरगुती गॅस सिलेंडरचा स्फोट झाल्याची घटना घडली. यामध्ये पाच जण गंभीर जखमी झाले आहेत. सर्व जखमींवर सध्या रुग्णालयामध्ये उपचार सुरू आहेत. घटनेची माहिती मिळताच अग्निशमनदल दाखल झाले असून परिस्थिती नियंत्रणात आणण्यात आली आहे.

याबाबत सविस्तर माहिती अशी की, पिंपरी चिंचवड शहरातील बौद्धनगर येथे आज सकाळी भीषण गॅस सिलेंडर स्फोट झाला आहे. या गॅस सिलेंडर स्फोटात पाच जण गंभीर जखमी झाले आहेत. जखमींवर सध्या पिंपरी चिंचवड महापालिकेच्या वायसीएम हॉस्पिटलमध्ये उपचार सुरू आहेत.

पिंपरी बौद्ध नगर बिल्डींग नंबर 16 मध्ये हा गॅस सिलेंडर स्फोट झाला आहे. 16 नंबर बिल्डिंग मधील एका रूममध्ये काही कामगार एकत्र राहतात. मात्र आज सकाळी साडेपाच वाजता दरम्यान हे कामगार स्वतःसाठी स्वयंपाक तयार करत असताना गॅस सिलेंडरची गॅस गळती होऊन हा स्फोट झाला आहे.

या स्फोटात मनोज कुमार (वय 19 वर्ष), धीरज कुमार (वय 23 वर्ष) गोविंद राम (वय 28 वर्ष) राम चेलाराम (वय 40 वर्ष) आणि सत्येंद्र राम (वय 30 वर्ष) हे पाच कामगार गंभीर जखमी झाली आहेत. जखमींवर पिंपरी चिंचवड महापालिकेच्या वायसीएम हॉस्पिटलमध्ये उपचार सुरू आहे. या घटनेने परिसरामध्ये एकच खळबळ उडाली आहे.