उल्हासनगरमधून एक धक्कादायक बातमी समोर येत आहे. एका अल्पवयीन मुलावर शौचालयात नेऊन लैंगिक अत्याचार करण्यात आला आहे. या संतापजनक प्रकाराची माहिती पीडित मुलाने थेट पालकांना सांगितली. पालकांनी तात्काळ मध्यवर्ती पोलीस ठाण्यात तक्रार दाखल केली. यानंतर पोलिसांनी गुन्हा दाखल करत नराधमाला अटक केली.

नेमकं काय घडलं?

पीडित लहान मुलगा उल्हालनगर येथील रहिवासी असल्याची माहिती समोर आली आहे. तर, आरोपीचे नाव अमित कोतपिल्ले असे आहे. ही संतापजनक घटना गुरूवारी दुपारी १ वाजण्याच्या सुमारास घडली. आरोपीने आधी मुलाला शौचालयात नेले. नंतर मुलाबरोबर लैंगिक अत्याचार केला. या घटनेनंतर पीडित मुलाने थेट घर गाठत पालकांना आपबिती सांगितली.

पीडित मुलाने पालकांना याबाबत सांगताच पालकांनी मुलाला घेऊन तात्काळ मध्यवर्ती पोलीस ठाण्यात तक्रार केली. यानंतर पोलिसांनी गुन्हा दाखल करत नराधम अमित कोतपिल्ले याला बेड्या ठोकल्या. कोतपिल्ले हा काही दिवसांपूर्वीच कारागृहातून सुटून आला असून यापूर्वी देखील त्याच्यावर गंभीर स्वरूपाचे गुन्हे दाखल आहेत.

त्याला कल्याण सत्र न्यायालयात हजर केलं असता न्यायालयाने त्याला पोलीस कोठडी सुनावली आहे. या घटनेनंतर परिसरात एकच खळबळ उडाली आहे.