बदलापूर - एका पाळीव कुत्र्याने एका लहान मुलावर हल्ला करून त्याचा चावा घेतल्याचा धक्कादायक प्रकार बदलापुर येथे घडला आहे. याप्रकरणी कुत्र्याच्या मालकावर गुन्हा दाखल करण्यात आला आहे. रितू वर्ल्ड नावाची सोसायटी बदलापूर (Badlapur) पश्चिमेच्या बॅरेज रोडला आहे. या सोसायटीतल्या सातव्या मजल्यावर निलेश बांगे हे आपल्या परिवारासह वास्तव्याला आहेत. त्याच इमारतीत पाचव्या मजल्यावर भावेश चौहान हे देखील राहतात. चौहान यांच्याकडे एक पाळीव कुत्रा आहे. शनिवारी दुपारी पावणेबाराच्या सुमारास निलेश बांगे हे त्यांच्या मुलासोबत जिन्याने खाली उतरत होते.

हे देखील पाहा -

ते पाचव्या मजल्यावर आले असता अचानक भावेश यांच्या घरातून त्यांचा पाळीव कुत्रा धावत आला आणि त्याने लहान मुलावर हल्ला चढवत त्याच्या पायाचा चावा घेतला. यावेळी निलेश यांनी कुत्र्याला हाकलल्याने तो आत पळाला. ही सगळी घटना जिन्यात लावलेल्या सीसीटीव्ही कॅमेरात कैद झाली.

या घटनेनंतर निलेश बांगे यांनी बदलापूर पश्चिम पोलीस ठाण्यात जाऊन तक्रार केली. त्यानुसार पोलिसांनी भावेश चौहान यांच्याविरोधात गुन्हा दाखल केला. या घटनेनंतर आपले पाळीव कुत्रे हे इतरांसाठी धोकादायक ठरू नये, आणि आपल्यासाठीही डोकेदुखी ठरू नये, याची काळजी घेण्याची आवश्यकता निर्माण झाली आहे.

Edited By - Shivani Tichkule