विकास मिरगणे - मुंबई

पनवेलमधील तळोजा गावात गॅरेज तोडल्याच्या रागातून हिंसाचाराची धक्कादायक घटना घडली आहे. ८ ऑगस्ट रोजी दुपारी दोनच्या सुमारास फरहान हार्डवेअर समोर, मन्नान कॉलनीकडे जाणाऱ्या रस्त्यावर धारदार चाकू, लोखंडी रॉड, लाकडी बांबू आणि दांडक्यांनी बेछूट हल्ला करण्यात आला. या घटनेत चार जण गंभीर जखमी झाले आहेत.

मिळलेल्या माहितीनुसार, मोटार दुरुस्ती गॅरेजवरील तक्रारीच्या वादातून हा हल्ला झाला. सय्यद परिवाराच्या तक्रारीनंतर सीडको अतिक्रमण विभागाने तीन वेळा गॅरेज तोडले होते. याचा राग मनात धरून आरोपींनी हल्ला केला. ही घटना घडली तेव्हा घडली सय्यद कुटुंबातील काही युवक दुपारची नमाज अदा करत होते.

आरोपी रौफ रजाक पटेल (६०) याच्यासह अफनान पटेल, सफवान पटेल, नवमान मुनाफ पटेल आणि इतर आठ-दहा जणांनी सय्यद परिवारातील युवकांवर अचानक जीवघेणा हल्ला केला. भांडण सोडवण्यासाठी आलेल्या नौफिल हानीफ सय्यद (४०) यांनाही मारहाण आणि धमकी देण्यात आली.सैफ हानीफ सय्यद (२४), सलमान सुफियान सय्यद (१९) आणि सफवान करीम तिदारे (२७) गंभीर जखमी झाले.

घटनेनंतर तळोजा पोलिसांनी घटनास्थळी पंचनामा करून स्टीलच्या चाकूचे कव्हर जप्त केले. मुख्य आरोपी रौफ रजाक पटेल याला ८ ऑगस्टच्या रात्री अटक करण्यात आली असून इतर आरोपी फरार आहेत. पोलिसांनी भादंवि कलम ३०७, ३२४, १४१, १४३, १४८, १४९, ५०४, ५०६ तसेच महाराष्ट्र पोलीस अधिनियम आणि ब.ना.स. कलमान्वये गुन्हा दाखल केला आहे. या घटनेनंतर तळोजा गावात तणावाचे वातावरण निर्माण झाले असून पोलिसांनी परिस्थिती नियंत्रणात ठेवण्यासाठी परिसरात गस्त वाढवली आहे.