पालघरमधील शेतकऱ्याने न्याय मिळवण्यासाठी अनोखं आंदोलन केल्याची घटना घडली आहे. मोखाडा तालुक्यातील शेतकऱ्याची म्हैस मृत झाल्यानंतर बँकेने विम्याची नुकसान भरपाई थकवली. याप्रकरणी न्याय मागण्यासाठी शेतकऱ्याने मृत म्हशीला बँकेसमोर आणत आंदोलन केलं आहे. या घटनेने परिसरात संतापाचे वातावरण पसरले आहे.

मिळालेल्या माहितीनुसार, मोखाडा तालुक्यातील टाकपाडा गावातील पशुपालक शेतकरी नवसु दिघा यांनी आपल्या पारंपरिक शेतीला जोडव्यवसाय म्हणून सन २०२२ मध्ये बँक ऑफ बडोदा या मोखाडा शाखेतून जवळपास बारा लाखांचे कर्ज घेतले. या कर्जातून दहा दूधाळ म्हैस खरेदी केल्या तसेच चोला मंडलम एम एस जनरल इन्शुरन्स कंपनीकडून या म्हशीना भविष्यात काही समस्या उद्भवलास बँकेकडून विमा कवच सुद्धा घेतले होते. मात्र म्हैस खरेदी केल्यानंतर वर्षे दोन वर्षात त्यांच्या तबेल्यातील दोन म्हैसी मेल्या.

यातली पहिली म्हैस २०२३ मध्ये मेली आणि दूसरी म्हैस ३० नोव्हेंबर २०२५ रोजी मृत्यूमुखी पडली आहे. मात्र विमा काढलेला असतानाही मोखाडा बँक ऑफ बडोदा शाखेच्या आडमुठे कर्मचाऱ्यांमुळे दोन वर्षांपूर्वीचे नुकसान भरपाईचे पैसे नवसु दिघा यांना मिळालेले नाहीत. आता मेलेल्या म्हशीचे पण पैसे मिळणार नाहीत म्हणून दिघा यांनी आपली मेलेली म्हैस ट्रॅक्टर मध्ये भरुन बँकेच्या समोर आणून ठेवली. एकतर मला इन्शुरन्सचे पैसे द्या नाहीतर तुम्ही दिलेली म्हैस परत घेऊन टाका अशी ठाम भुमिका घेतली होती. त्यामुळे काहीकाळ बँकेत तणावाचे वातावरण निर्माण झाले होते. यावेळी येथे पोलीस प्रशासन ही तैनात झाले होते.

मोखाडातील बँक ऑफ बडोदा शाखेतील कर्मचाऱ्यांकडून नेहमी ग्राहकांची फसवणूक केली जाते असा आरोप सुध्दा यावेळी शेतकऱ्यांनी केला. त्याचप्रमाणे दोन वर्षांपूर्वी घोसाळी गावातील शेतकरी मधू माळी,गुंबाडपाडा गावातील शेतकरी आंबेकर यांनी देखील बँक ऑफ बडोदा शाखेतून कर्ज घेऊन म्हैसी खरेदी केल्या होत्या.

त्यांच्या म्हैशी मरुन दीड वर्षाचा कालावधी होऊन गेला आहे, तरी सुद्धा त्यांना ही विम्याची नुकसान भरपाईची रक्कम मिळालेली नाही. बँकेच्या या ढोबळ कारभारामुळे संतप्त झालेल्या काही पशुपालक शेतकऱ्यांनी त्यामुळे बँक ऑफ बडोदा शाखेतील कर्मचाऱ्यांकडून अशीच जबरदस्ती चालू राहीली तर आत्महत्या करण्याचा विचार करावा लागेल असा इशारा बँकेला दिला आहे.